No Water Shortage in 2024: यावर्षी जरा उशीराच सुरू झालेला पाऊस आता परतीच्या मार्गावर आहे. महिनाभर उशीराच सुरू झाला असला तरी राज्याची तहान भागवू शकेल इतका पाऊस यंदा झाला.

याबाबत जलसंपदा मंत्री सुभाष शिरोडकर यांनी सांगितले की, डिचोलीतील साळ येथे शापोरा नदीवर बांधण्यात येणारा 300 कोटी रुपयांचा बंधारा प्रकल्प डिसेंबर 2024 पर्यंत तयार होईल अशी अपेक्षा आहे.

हा बंधारा एकदा वापरात आल्यावर 250MLD पाणी साठवणुकीसाठी ठेवण्यास मदत होईल. त्यामुळे राज्याची पाण्याची कोणतीही कमतरता भासणार नाही.

ते म्हणाले की, डिसेंबर 2024 पर्यंत बंधारा वापरासाठी तयार होणे अपेक्षित आहे. एकदा तो तयार झाल्यानंतर, सर्व पाण्याच्या गरजा पूर्ण केल्या जातील. या बंधाऱ्यामुळे कळंगुट आणि चांदेल जलशुद्धीकरण प्रकल्पांना पुरवण्यासाठी अतिरिक्त कच्चे पाणी साठवण्यास मदत होईल.

यामुळे बार्देश, डिचोली आणि पेडणे तालुक्यांतील पाण्याची गरज पूर्ण होण्यास मदत होईल. या बंधाऱ्यामुळे तिलारी धरणातील जास्तीचे पाणी नदीत सोडल्यानंतर पूर टाळण्यासाठी देखील मदत होणार आहे.

दुसरीकडे, चांदेल प्रकल्पाची क्षमता 15MLD वरून 30MLD पर्यंत दुप्पट करण्याचे काम जवळपास पूर्ण झाले आहे. त्यासोबतच इतर जल प्रकल्पांची कामे देखील लवकरच पूर्ण होणार आहेत. त्यामुळे गोव्यात 2024 मध्ये पाण्याची कमतरता भासणार नसल्याचे मंत्री शिरोडकर यांनी सांगितले.