Panaji News : पणजी, राज्यातील प्राथमिक आरोग्य केंद्रे आणि इस्पितळांच्या देखरेख समित्यांवर राजकीय नियुक्त्या केल्या जाणार नाहीत,अशी महत्त्वपूर्ण घोषणा आरोग्यमंत्री विश्वजीत राणे यांनी आज विधानसभेत केली. या समित्यांवर आमदारांच्या शिफारशीनुसार नियुक्ती केली जात असे.
सांतआंद्रेचे आमदार वीरेश बोरकर यांनी लक्षवेधी सूचनेवर बोलताना गोमेकॉत देखरेख समिती नेमलेली नाही आणि त्यासाठी नावांची शिफारस करणारे पत्र पाठवल्याचे नमूद केले होते. त्याला उत्तर देताना राणे यांनी अशा समित्यांवर विविध क्षेत्रात वावरणाऱ्या व्यावसायिक व तज्ज्ञांची निवड सरकार मुख्यमंत्र्यांशी चर्चा केल्यानंतर करेल, असे सांगितले.
मूळ विषय हा अवयव व इतर रोपणाविषयी होता. अशा रोपणासाठी लागणाऱ्या वस्तू रुग्णांना विकत आणाव्या लागतात. त्यामुळे यात लक्ष घालण्याची मागणी केली होती. त्याला राणे यांनी उत्तर दिले. आमदार वेन्झी व्हिएगश म्हणाले, मंत्र्यांना साऱ्या गोष्टींची माहिती नसते. तेथे रुग्णांच्या नातेवाईकांना पैसे मोजावे लागतात. बोरकर यांनीही हा मुद्दा मांडला.
‘गोमेकॉ’त अंतर्गत परीक्षण करणार!
आरोग्यमंत्री राणे म्हणाले, ‘गोमेकॉ’त रोपणाविषयी लागणाऱ्या जास्तीत जास्त वस्तू मोफत पुरवल्या जातात. दीनदयाळ स्वास्थ्य सेवा योजनेतही काहींचा समावेश केला आहे. रुग्णांना वाजवी दरात या वस्तू मिळाव्यात यासाठी ‘गोमेकॉ’ने काही पुरवठादारांशी दर करार केले आहेत.
त्यामुळे कोणत्याही पुरवठादाराकडून वस्तू घेतली तरी तोच दर द्यावा लागणार आहे. रोपणासाठी लागणाऱ्या वस्तूंची मागणी आणि पुरवठा याची स्थिती समजण्यासाठी परीक्षण करण्याचा निर्णय घेतला आहे. हे अंतर्गत परीक्षण सेवा सुधारण्यास मदत करेल.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.