वाळपई : सत्तरी तालुक्यातील घाटमाथ्यावर असलेल्या सुर्ला गावात गेल्या चार दिवसांपासून वीज गायब झाल्याने त्याचा परिणाम जनजीवनावर झाला. गेल्या चार दिवसांपासून अंधारात दिवस काढलेल्या सुर्ल गावातील नागरिकांनी शुक्रवारी वेळूस कार्यालयावर धाव घेऊन सहाय्यक वीज अभियंता दीपक गावस यांना जाब विचारला. (No electricity in Surla snd Sattari for four days goa)

चार दिवसांपासून वीज समस्या निर्माण झाल्याने सुर्ला गावच्या लोकांना त्रास सहन करावा लागला. नागरिकांनी आक्रमक भूमिका घेऊन वीज खात्याच्या निष्क्रीयतेबाबत ताशेरे ओढल्यानंतर वीज दुरुस्तीसाठी लाईनमन यांना पाठविण्यात आले.

ग्रामस्थ दीपक गावकर म्हणाले गेल्या चार दिवसांपासून गावात वीज नाही. त्यामुळे गावकऱ्यांना अनेक अडचणींना तोंड द्यावे लागले. वीज नसल्यामुळे पिण्याचे पाणी मिळालेले नाही.

वीजपुरवठा सुरळीत करण्यात वीज कार्यालयात वारंवार संपर्क करूनही प्रतिसाद मिळाला नाही. वीज खात्याचे अधिकारी व लाईनमन यांना ग्रामीण भागातील जनतेचे काहीच पडून गेलेले नाही.

तब्बल 55 किलोमीटर अंतर पार करून वाळपईत वीज समस्येसंबंधी जाब विचारण्यास यावे लागते, हे वीज खात्याचे अपयश आहे. वीज दुरुस्ती यंत्रणा अत्यंत वाईट व कुचकामी असल्याचा अनुभव आला आहे, असेही गावकर म्हणाले.

संतोष गावकर म्हणाले, अभियंता दीपक गावस यांना सुर्ला गावातील वीज समस्येची माहिती दिल्यानंतरच त्यांना या प्रकाराची माहिती झाली. परंतु सुर्लसारख्या दुर्गम ठिकाणी वीजपुरवठा सुरळीत होतो की, नाही हे पाहण्याची जबाबदारी हे खाते टाळत असल्याचा आरोप त्यांनी केला.

सत्तरी तालुक्यातील वीज समस्या सोडविण्यासाठी भूमीगत वीज वाहिन्यांचा प्रस्तावही तयार केला आहे. जेणेकरून भविष्यात वीज समस्या होणार नाही. जवळपास 80 कोटींच्या भूमीगत वीजवाहिनीचा प्रकल्प येणार आहे. त्याला मान्यता मिळणे गरजेचे आहे. प्रथम वाळपईत त्यानंतर भिरोंडा, पाडेली, झर्मे, म्हाऊस आदी गावासाठी हा प्रस्ताव तयार केल्याचे सहाय्यक वीज अभियंता दीपक गावस यांनी सांगितले.