सार्वजनिक बांधकाम खात्‍याने राज्‍याच्‍या विविध भागांतील मोडकळीस आलेल्या २७ इमारतींची यादी तयार ​केली आहे. काही मोडकळीस आलेल्या इमारती, ज्यांची दुरुस्ती करता येत नाही, त्या पाडण्यात येणार आहेत.

तसेच काहींचे नूतनीकरण करण्यात येणार आहे. विशेष म्‍हणजे राजधानी पणजीत अशी एकही जीर्ण इमारत नाही, जी कोसळू शकते, असा साबांखा अधिकाऱ्यांचा दावा आहे.

राज्‍यात अनेक ठिकाणी जीर्ण झालेल्‍या इमारती आहेत, ज्‍या कधीही कोसळून अनर्थ घडू शकतो. सध्‍या पावसाने जोर धरल्‍यामुळे हा धोका आणखी वाढला आहे. त्‍यामुळे लोक भीतीच्‍या छायेखाली दिवस काढत आहेत. लोकवस्तीच्या भागात उभ्या असलेल्या काही जुन्या इमारतींची संरचनात्मक स्थिरता चाचणी घेणे बनली आहे.

साबांखा इमारत विभागातील एका उच्चपदस्थ अधिकाऱ्याने सांगितले की, सार्वजनिक बांधकाम खात्याने राज्यभरातील मोडकळीस आलेल्या २७ इमारतींची यादी तयार केली आहे. यापैकी काही इमारती, ज्यांचे नूतनीकरण होऊ शकत नाही, त्या पाडल्या जातील आणि उर्वरित जुन्या इमारतींचे नूतनीकरण केले जाईल.

राजधानी पणजी शहरात धोकादायक स्थितीत अशी एकही इमारत नाही जी कोसळू शकते. सार्वजनिक बांधकाम खात्‍याच्‍या वतीने पणजीतील तीन मोठ्या व जुन्या इमारतींचे नूतनीकरण लवकरच हाती घेण्‍यात येईल, असे सार्वजनिक बांधकाम खात्‍याचे साहाय्यक अभियंता दत्तप्रसाद गावकर म्हणाले.