मतदारांना विश्वासात न घेता सरपंच तुळशीदास गावास यांच्या विरोधात अविश्वास ठराव नोटिसेवर सही केली व गेले काही दिवस गायब होऊन शुक्रवार (दि. १२ डिसेंबर) रोजी अविश्वास ठराव चर्चेसाठी आलेल्या हसापूरचे पंचायत सदस्य बाळा शेटकर हे कारमधून उतरताच त्यांच्या प्रभागातील मतदारांनी त्यांना घेरून जाब विचारला व पंच सदस्य बाळा शेटकर हे ग्रामपंचायत कार्यालयात जाऊ शकले नाही. संपूर्ण पेडणे तालुक्याचे लक्ष लागून राहिलेला चांदेल हसापूरचे सरपंच तुळशीदास गावस यांच्याविरुद्धचा अविश्वास ठराव शेवटी आवश्यक पंचांच्या संख्ये अभावी बारगळला.

आमदार प्रवीण आलेकर विरुद्ध सरपंच तुळशीदास गावस असे या अविश्वास ठरावाला स्वरूप आले होते व दोघांच्या प्रतिष्ठेचा प्रश्न असल्याने याकडे संपूर्ण पडणे तालुक्याचे लक्ष लागून राहिले होते. बाउन्सरसोबत आल्याने वातावरण तंग झाले. चांदेल ग्राम पंचायतीत एकूण पाच पंचायत सदस्य आहेत.

नेमके काय आणि कसे घडले?

पंच बाळा शेटकर हे एका कारमधून उतरले. यावेळी त्यांच्यासोबत काही व्यक्ती होते. पंच शेटकर हे गाडीतून उतरताच "तुला आम्ही निवडून दिले आहे. आम्हाला न विचारता तू कुणाच्या सांगण्यावरून अविश्वास ठरावावर सही केली व कुठे दडून बसलास होतास?

या अनोळखी व्यक्ती म्हणजे बाऊन्सर आहेत. हे बाऊन्सर तुला कोणी पुरवले? " अशा प्रश्नांचा भडिमार तेथे उपस्थित बाळा शेटकर यांच्या प्रभागातील नागरिकांनी त्यांच्यावर केला. लोकांच्या प्रश्नांना ते समाधानकारक उत्तरे देऊ शकले नाहीत.

दुसऱ्या बाजूने ग्रामपंचायत कार्यालयात नोटीसीवर सही केलेल्या उपसरपंच रुचिरा मळीक व प्रजय मळीक हे दोघेच पंचायत सदस्य राहिले. त्यामुळे आवश्यक संख्येअभावी ठराव मांडायाला व त्याला अनुमोदन देण्याएवढी संख्या नसल्याने पेडणे गटविकास कार्यालयातून आलेले निवडणूक निरीक्षक भिया ठाकूर यांनी हा अविश्वास ठराव बारगळल्याचे जाहीर केले.