पणजी: भारतीय जनता पक्षाचे राष्ट्रीय अध्यक्ष नितीन नवीन सध्या दोन दिवसीय गोवा दौऱ्यावर असून त्यांनी 2027 च्या विधानसभा निवडणुकीसाठी भाजपच्या विजयाचा एक अत्यंत महत्त्वाकांक्षी आणि आक्रमक 'ॲक्शन प्लॅन' कार्यकर्त्यांसमोर मांडला. कार्यकर्त्यांना संबोधित करताना त्यांनी केवळ विजयाचाच नाही, तर प्रत्येक बूथवर किमान 50 टक्के मते मिळवण्याचे मोठे लक्ष्य निश्चित केले.

त्यांच्या मते, जर आपल्याला खरोखरच विकसित भारत आणि विकसित गोव्याचे स्वप्न पूर्ण करायचे असेल, तर प्रत्येक बूथ अध्यक्षाने आपल्या बूथवर एनडीए आणि कमळ चिन्हाला 50 टक्क्यांहून अधिक मते मिळवून देण्याची शपथ घेतली पाहिजे.

नितीन नवीन यांनी आपल्या भाषणात गोव्याच्या (Goa) कानाकोपऱ्यात पक्ष पोहोचवण्यावर भर दिला. ते म्हणाले की, 2027 च्या निवडणुका आता जवळ येत आहेत, त्यामुळे आपल्याला केवळ काही विशिष्ट मतदारसंघांवर लक्ष केंद्रित करुन चालणार नाही. उत्तर-पश्चिमेतील पेडणेपासून ते उत्तर-पूर्वेतील वाळपईपर्यंत आणि दक्षिण-पश्चिमेतील काणकोणपासून ते दक्षिण-पूर्वेतील सांगेपर्यंत, अशा प्रत्येक भौगोलिक क्षेत्रात भाजपची ताकद दिसून आली पाहिजे.

तळागाळातील कार्यकर्ता हा भाजपचा सर्वात मोठा आधार आहे आणि त्याने प्रत्येक घरात जाऊन सरकारच्या कामगिरीची आणि प्रयत्नांची माहिती लोकांपर्यंत पोहोचवणे आवश्यक आहे. "बूथ लेव्हलपासून ब्लॉक लेव्हलपर्यंत संघटना जितकी भक्कम होईल, तितकाच आपला विजय निश्चित होईल," असे त्यांनी कार्यकर्त्यांना बजावले.

सर्वात महत्त्वाची बाब म्हणजे, नितीन नवीन यांनी राज्य आणि जिल्हा पातळीवर निवडणुकीची रणनीती आधीच तयार असल्याचे स्पष्ट केले. आता या रणनीतीची प्रत्यक्ष अंमलबजावणी करण्याची संपूर्ण जबाबदारी कार्यकर्त्यांवर आहे. "प्लॅनिंग पूर्ण झाले आहे, आता अंमलबजावणी ही तुमची जबाबदारी आहे," असे म्हणत त्यांनी कार्यकर्त्यांना सक्रिय होण्याचे आवाहन केले. 50 टक्के मतांचे हे लक्ष्य गाठण्यासाठी प्रत्येक बूथ अध्यक्षाने आत्तापासूनच सूक्ष्म नियोजन (Micro-planning) करावे, अशी सूचना त्यांनी केली. नितीन नवीन यांच्या या आवाहनामुळे भाजप कार्यकर्त्यांमध्ये नवा जोम संचारला असून, आगामी निवडणुकांसाठी भाजपने आत्तापासूनच 'इलेक्शन मोड' मध्ये प्रवेश केल्याचे या दौऱ्यातून स्पष्ट झाले आहे.