मडगाव: मडगाव पोलिसांनी कर्नाटकातील निपाणी येथील अटक केलेले फिरोज व नदीम हे दोघेही चिकन विक्रेते असून ते गोव्यात गांजा  पुरवत होते, अशी धक्कादायक बाब  तपासात उघड झाली आहे.

 ते दुचाकीवरून मडगावला गांजा घेऊन आले होते. पोलिसांना  त्याचा सुगावा लागला होता. रविवारी  सापळा रचून पोलिसांनी त्यांच्या मुसक्या आवळल्या. त्याच्याकडील दुचाकीही पोलिसांनी  जप्त केली आहे. 

सोमवारी दोघांना मडगावच्या प्रथम वर्ग न्यायालयात उभे केले असता त्यांना सहा दिवसांची पोलिस कोठडी देण्यात आली.  संशयितांकडे ३.८०१ किलो गांजा सापडला. त्याची किंमत  ३ लाख ८० हजार इतकी आहे.

निपाणीत  मोठ्या प्रमाणात तंबाखुची लागवड केली जात आहे. काहीजण तेथे गांजा  लागवड करतात. गोव्यात हा गांजा पाठवला जातो. त्याचे मोठे रॅकेट असल्याचा अंदाज पोलिसांनी व्यक्त केला आहे. संशयित वारंवार गोव्यात चिकन पुरवठा करण्यासाठी येत होते, त्याचे येथे काही खास ग्राहकही होते, असे पोलिस सांगतात.

चौकशी दरम्यान सर्व गोष्टी उघड होणार आहेत.  पोलिस निरीक्षक सूरज सामंत यांच्या मार्गदर्शनाखाली उपनिरीक्षक समीर गावकर तपास करीत आहेत.  अमली पदार्थ प्रतिबंधकात्मक  कायद्याखाली पोलिसांनी त्यांच्यावर गुन्हा नोंद केला आहे.