Nilesh Cabral CM Pramod Sawant Allegations Clarification

पणजी: माजी मंत्री तथा आमदार नीलेश काब्राल यांनी काही दिवसांपूर्वी मुख्यमंत्र्यांच्या आश्वासनाची पुनरावृत्ती करून सरकारवर टीका केली होती. मात्र, मुख्यमंत्री प्रमोद सावंत यांनी पक्षाच्या आमदारांना सार्वजनिकरीत्या नकारात्मक विधाने न करण्याची तंबी दिल्यानंतर काब्राल यांनी आपण सरकारवर टीका केली नसून केवळ मुख्यमंत्र्यांनी दिलेल्या आश्वासनाची आठवण करून दिली, असे स्पष्टीकरण दिले.

दरम्यान, मुख्यमंत्री प्रमोद सावंत यांनी पक्षाच्या आमदारांना सार्वजनिकरीत्या नकारात्मक विधाने न करण्याचे आवाहन करत कोणतेही प्रश्न किंवा समस्या पक्षाच्या अंतर्गत चर्चेत सोडवण्यास सांगितले.

नीलेश काब्राल म्हणाले, इस्पितळाला काही सुविधा कमी आहेत असे मी म्हटले, पण मुख्यमंत्री आणि आरोग्यमंत्री या प्रश्नावर काम करत आहेत. नागरिक जेव्हा प्रश्न विचारतात, तेव्हा मी त्यांना हीच माहिती दिली.

माझी मुख्यमंत्र्यांवर टीका नाही; काब्राल

कुडचडे बसस्थानक प्रकल्पाच्या दुसऱ्या टप्प्याचा उशीर आणि अन्य विकासकामांवर विचारणा झाल्यावर काब्राल यांनी सांगितले की, २०१३-१४ पासून सुरू असलेल्या प्रकल्पांवर अजूनही पाठपुरावा सुरू आहे. मी टीका केली नाही आणि मुख्यमंत्र्यांवर टीका करण्याचा प्रश्नच उद्भवत नाही. ते आमचे मुख्यमंत्री असून सरकार आपलेच आहे, असे त्यांनी ठामपणे सांगितले.

जिल्हाध्यक्ष निवडणुका शुक्रवारी

भाजप पक्षाच्या जिल्हाध्यक्ष निवडणुका १० जानेवारीला होणार असून, ११ जानेवारीला निवडणूक निकाल जाहीर केले जातील. त्यानंतर प्रदेशाध्यक्षांची निवड प्रक्रिया सुरू होईल, अशी माहिती भाजप प्रदेशाध्यक्ष सदानंद शेट तानावडे यांनी दिली.