वास्को: डिजिटल युगात सायबर गुन्हेगारीचे जाळे किती भयानक असू शकते, याचा एक हृदयद्रावक प्रत्यय गोव्यात आला आहे. वास्को येथील बायणा भागात राहणाऱ्या एका व्यक्तीने सायबर भामट्यांच्या सततच्या जाचाला आणि धमक्यांना कंटाळून आपले जीवन संपवले आहे. बनावट कर्ज योजना आणि स्वतःला पोलीस अधिकारी म्हणवून घेणाऱ्या गुन्हेगारांनी केलेल्या मानसिक छळामुळे हा टोकाचा निर्णय घेतल्याचे समोर आले आहे.
मिळालेल्या माहितीनुसार, या प्रकरणाची तक्रार मृत व्यक्तीच्या ३६ वर्षीय मुलीने वास्को पोलीस ठाण्यात दिली आहे. अब्दुल खान (रा. बायणा) आणि त्याच्या एका साथीदाराने पीडित व्यक्तीला स्वस्त दरात कर्ज मिळवून देण्याचे आमिष दाखवले होते. या बहाण्याने त्यांनी पीडिताच्या नावावर एका बँकेत खाते उघडायला लावले. मात्र, खाते उघडल्यानंतर आरोपींनी हुशारीने पासबुक आणि एटीएम कार्ड स्वतःच्या ताब्यात घेतले आणि त्या खात्यावरून संशयास्पद आर्थिक व्यवहार सुरू केले.
फसवणुकीचा हा प्रकार इथेच थांबला नाही. एका अज्ञात आरोपीने मुंबई पोलिसांचा बनावट अधिकारी असल्याचे भासवून पीडित व्यक्तीशी व्हॉट्सॲपवर संपर्क साधला. आरोपी वारंवार व्हिडिओ कॉल करून पीडिताला धमकावत होता. इतकेच नाही तर, अश्लील मजकूर प्रसारित केल्याचा आणि बेकायदेशीर कृत्यांमध्ये सामील असल्याचा बनावट 'एफआयआर' (FIR) तयार करून तो पीडिताला पाठवण्यात आला. यामुळे आपण मोठ्या संकटात सापडलो आहोत, अशी भीती मृताच्या मनात निर्माण झाली.
सायबर गुन्हेगारांकडून होणारे सततचे फोन कॉल्स आणि पोलिसांच्या नावाखाली दिल्या जाणाऱ्या धमक्यांमुळे पीडित व्यक्ती प्रचंड मानसिक तणावाखाली होती. समाजात बदनामी होईल आणि पोलीस अटक करतील, या भीतीने त्यांना ग्रासले होते. अखेर या मानसिक छळाला सहन न झाल्याने त्यांनी आत्महत्येसारखे टोकाचे पाऊल उचलले. या घटनेने संपूर्ण वास्को परिसरात खळबळ उडाली असून सायबर सुरक्षेचा प्रश्न पुन्हा ऐरणीवर आला आहे.
वास्को पोलिसांनी या प्रकरणी गुन्हा दाखल केला असून पुढील तपास सुरू केला आहे. आरोपींनी वापरलेले बँक खाते आणि व्हॉट्सॲप नंबरचा मागोवा घेतला जात आहे. "लोकांनी कोणत्याही अनोळखी व्यक्तीला आपली बँक कागदपत्रे देऊ नयेत आणि अशा प्रकारच्या धमक्यांना न घाबरता पोलिसांशी संपर्क साधावा," असे आवाहन प्रशासनाकडून करण्यात आले आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.