म्हापसा: पावसाळ्याचे आगमन जवळ येत असल्याच्या पार्श्वभूमीवर म्हापसा येथील असुरक्षित आणि धोकादायक इमारतींची पुनर्तपासणी मोहीम गुरुवारी बार्देशच्या उपजिल्हाधिकारी वर्षा परब यांच्यासह म्हापसा नगरपालिका आणि सार्वजनिक बांधकाम विभागाच्या इमारत विभागाच्या अधिकाऱ्यांनी संयुक्तपणे राबवली.पावसाळ्याच्या पूर्वतयारीचा भाग म्हणून आणि संरचनात्मकदृष्ट्या कमकुवत असलेल्या इमारतींमुळे कोणतीही अनुचित घटना घडू नये, यासाठी उत्तर गोव्याच्या जिल्हाधिकाऱ्यांनी दिलेल्या आदेशानुसार ही तपासणी मोहीम हाती घेण्यात आली होती.

या मोहिमेदरम्यान, तपासणी पथकाने असुरक्षित आणि धोकादायक म्हणून घोषित केलेल्या अनेक शासकीय तसेच खासगी इमारतींना प्रत्यक्ष भेटी देऊन त्यांच्या सद्यस्थितीचा आणि संरचनात्मक स्थिरतेचा (स्ट्रक्चरल स्टॅबिलिटी) आढावा घेतला.

याबाबत माहिती देताना बार्देशच्या उपजिल्हाधिकारी वर्षा परब म्हणाल्या, असुरक्षित म्हणून चिन्हांकित करण्यात आलेल्या इमारतींच्या संरचनात्मक स्थिरतेची तपासणी करण्यासाठी आणि संभाव्य दुर्घटना टाळण्यासाठी आवश्यक त्या उपाययोजना व कारवाई करण्याच्या उद्देशाने आम्ही म्हापशात ही पुनर्तपासणी मोहीम राबवत आहोत. म्हापसा नगरपालिकेने निश्चित केलेल्या खासगी इमारतींचा तसेच पीडब्ल्यूडी इमारत विभागाने चिन्हांकित केलेल्या शासकीय इमारतींचा या तपासणीत समावेश असल्याचे त्यांनी पुढे सांगितले.

इमारत खाली करण्याच्या लवकरच नोटिसा

मिळालेल्या माहितीनुसार, म्हापसा नगरपालिकेने शहरात सुमारे ४२ धोकादायक आणि मोडकळीस आलेल्या इमारतींची ओळख पटवली आहे. सध्या वापरात असलेल्या किंवा लोक राहत असलेल्या धोकादायक इमारतींच्या मालकांना जागा रिकामी करण्याबाबत नोटिसा बजावण्याची प्रक्रिया पालिकेकडून सुरू आहे.

इमारत मालकांना उपाययोजनांचे निर्देश

शहरातील असुरक्षित व धोकादायक असलेल्या इमारतींच्या मालकांना आवश्यक त्या सुरक्षा उपाययोजना तातडीने करण्याचे निर्देश देण्यात आले आहेत. सार्वजनिक बांधकाम विभागाच्या इमारत विभागानेही सुमारे ६ ते ७ असुरक्षित इमारती शोधून काढल्या असून यात प्रामुख्याने जुन्या शासकीय निवासी क्वार्टर्सचा समावेश आहे.