मोरजी: हणखणे येथील झारापकर रबर प्लांटेशनजवळ वीज तारेवर काठी फेकून वीजपुरवठा खंडित करण्यात आल्याचा धक्कादायक प्रकार उघडकीस आला आहे. या घटनेमुळे हणखणे परिसरातील नागरिकांना बराच वेळ अंधाराचा सामना करावा लागला, तर व्यावसायिकांचेही मोठे नुकसान झाले.

वीजपुरवठा खंडित झाल्यानंतर दोष शोधून तो दुरुस्त करण्यासाठी पेडणे येथून विद्युत खात्याच्या कर्मचाऱ्यांना तब्बल २० ते २५ किलोमीटर अंतर पार करून घटनास्थळी जावे लागले. अखेर त्यांनी मेहनत घेऊन वीजप्रवाह पूर्ववत केला. मात्र, अशा प्रकारामुळे कर्मचाऱ्यांनीही तीव्र नाराजी व्यक्त केली. या अचानक खंडित झालेल्या वीजेमुळे इब्रामपूर-हणखणे ग्रामपंचायत क्षेत्रातील छोटे-मोठे व्यवसाय ठप्प झाले. हॉटेल्ससह विविध व्यावसायिक आस्थापनांचे आर्थिक नुकसान झाल्याचे सांगण्यात आले.

दरम्यान, हा प्रकार रात्रीच्या वेळी मुद्दाम घडवून आणला असावा, अशी शक्यता व्यक्त होत आहे. अज्ञात व्यक्तीकडून जाणूनबुजून असे दुष्कृत्य करण्यात आल्याचा संशय व्यक्त केला जात असून, संबंधिताचा शोध घेण्याची मागणी स्थानिकांकडून होत आहे. एका अज्ञात व्यक्तीने हणखणे येथील वीज तांरावर अशी बांबूची काठी फेकून वीज प्रवाह खंडित केला आहे. या प्रकाराबद्दल परिसरात संताप व्यक्त केल्या जात आहे.