पणजी: सरत्या वर्षाला निरोप देऊन नव्या वर्षाचे जल्लोषात स्वागत करण्यासाठी दरवर्षी लाखो पर्यटक गोव्यात दाखल होत असतात. यावर्षी नववर्षाच्या पूर्वसंध्येला पर्यटकांच्या जल्लोषाला गालबोट लागणारी घटना घडली. मोरजी समुद्रकिनाऱ्यावर बिहारचे दोन पर्यटक बुडाले. यापैकी एकाचा मृत्यू झाला असून, दुसरा जखमी झाला आहे.

आदित्य नारायण (वय २६, रा. बिहार) असे बुडून मृत्यू झालेल्या तरुणाचे नाव आहे. तर, आदित्यराज (२५) असे या दुर्घटनेत जखमी झालेल्या तरुणाचे नाव आहे. मोरजी समुद्रकिनाऱ्यावर बुधवारी (३१ डिसेंबर) सायंकाळी सहाच्या सुमारास ही घटना घडली. दोघांनी जीवरक्षकांनी दिलेल्या सुचनांकडे दुर्लक्ष केल्याचा आरोप केला जात आहे.

सायंकाळी पर्यटकांनी समुद्रातून बाहेर पडण्याची सूचना करण्यात आली होती. पण, अनेकांनी या सुचनांकडे दुर्लक्ष केले, अशी माहिती आहे. दोन्ही तरुण पाण्यात असताना बुडू लागले, जीवरक्षकांनी दोघांना बाहेर काढले पण, त्यांच्या पोटात पाणी गेल्याने ते बेशुद्ध पडले होते. दोघांना प्रथमोपचार देण्यात आला.

दोघांना उपचारासाठी तुये रुग्णालयात दाखल करण्यात आले तिथे आदित्य नारायण याचा मृत्यू झाल्याचे घोषित करण्यात आले. तर, आदित्यराजला उपचारासाठी सुरुवातीला म्हापसा व नंतर गोमेकॉत दाखल करण्यात आले. त्याच्यावर सध्या उपचार सुरु आहेत. या घटनेचा पोलिस अधिक तपास करत आहेत.