मडगाव येथील न्यू मार्केट विक्रेते संघटनेच्या पदाधिकारी व दुकानदारांनी नगराध्यक्ष दामोदर शिरोडकर तसेच मुख्याधिकारी गौरीश शंखवाळकर यांची भेट घेऊन मडगावमधील बेकायदेशीर विक्रेत्यांवर कारवाई करण्याची मागणी केली. हे विक्रेते मडगावमधील सर्व रस्ते व्यापून टाकतात. यामुळे पादचाऱ्यांनाही चालण्यास त्रास होत असल्याचे या शिष्टमंडळाने नगराध्यक्षांच्या नजरेस आणून दिले.

आम्ही नगरपालिकेला भाडेपट्टी भरतो, कर भरतो. या बेकायदेशीर विक्रेत्यांकडून नगरपालिकेला कोणतीही आर्थिक आवक होत नसताना आम्हाला त्रास सोसावा लागत आहे. आमच्याकडे गिऱ्हाईक फिरकत नसल्याने आम्हाला नुकसानीला तोंड द्यावे लागत असल्याचेही या शिष्टमंडळाने नगराध्यक्षांना सांगितले. नगराध्यक्षाने त्यांचे सर्व म्हणणे ऐकून घेऊन त्यांच्या समस्या सोडविण्याचे आश्र्वासन दिले.

दरम्यान, दुकानदारांनी पालिकेने व्यापारी परवाना देण्याची मागणी केल्यानंतर मुख्याधिकाऱ्यांनी संगितले की, सर्वप्रथम मार्केटचे सर्वेक्षण करून योग्य माहिती मिळवली जाईल. त्यानंतर कार्यवाही केली जाईल.तसेच आपण याविषयात खास लक्ष देणार असल्याचेही शंखवाळकर यांनी सांगितले.

सुरक्षेला प्राधान्य द्यावे

न्यू मार्केटमध्ये आग विझविण्यासाठी कसलीही व्यवस्था नाही. आम्ही पाण्याच्या टाकीची मागणी केली आहे. पालिकेने न्यू मार्केटमधील विक्रेते व गिऱ्हाईकांच्या सुरक्षेला प्राधान्य द्यावे.

जिथे जिथे हे बेकायदेशीर विक्रेते बसतात त्या जागा आम्ही नगराध्यक्षांच्या लक्षात आणून दिल्या आहेत. पहाटे फळे विक्रेते येऊन मार्केटबाहेरील रस्ता व्यापून टाकतात व ते ८ वा.नंतरही असतात.

न्यू मार्केटमधील विक्रेत्यांना त्यांच्या दुचाकी पार्क करता येत नाहीत. या विक्रेत्यांना सकाळी ८ वा.पूर्वी तिथून हटविण्याची मागणी केल्याचे न्यू मार्केट विक्रेते संघटनेचे अध्यक्ष गोपाळ नाईक यांनी सांगितले.