वास्को: नवीन मासळी मार्केटात सोमवारपासून (ता. २९) मासेविक्री करावी, असा आदेश मुख्याधिकारी सिद्धिविनायक नाईक यांनी काढला असतानाही मासे विक्रेत्यांनी कोणताही प्रतिसाद दिला नाही, त्यामुळे येथे विविध प्रतिक्रिया व्यक्त होत आहेत. याबाबत नगराध्यक्ष गिरीश बोरकर यांनी सांगितले की, आम्ही आणखी दोन दिवस वाट पाहणार आहोत, त्या दरम्यान मासे विक्रेत्यांनी नवीन मार्केटात स्थलांतर केले तर ठीक आहे, नाही तर आम्हाला पुढील कारवाई करावी लागेल, असे ते म्हणाले.

पालिकेने नवीन मासळी मार्केट बांधले आहे. या मार्केटाचे उद्‍घाटन कधी होणार आहे? हे मार्केट पांढरा हत्ती तर होणार नाही ना? असे विविध प्रश्न नागरिकांकडून उपस्थित करण्यात येत होते. हे मार्केट जीसुडाने सष्टेंबर महिन्यात मुरगाव पालिकेकडे हस्तांतरित केले होते. दोन वेळा उद्‍घाटनाची तारीख घोषित करूनही उद्‍घाटन न झाल्याने हे मार्केट चर्चेत आले होते.

नवीन मार्केटात मासळी विक्रेत्यांनी स्थलांतर करण्याची गरज होती, मात्र आमच्या काही मागण्या पूर्ण करण्यात आल्या नसल्याचा दावा करत मागण्या पूर्ण झाल्यावरच आम्ही तेथे स्थलांतर करू असे मासळी विक्रेत्यांनी स्पष्टपणे सांगितले होते. त्यामुळे त्यांच्या प्रलंबित मागण्या पूर्ण करण्यात आल्या.

दरम्यान, मुख्याधिकारी सिद्धिविनायक नाईक यांनी मासळी विक्रेत्यांनी मार्केटमध्ये स्थलांतरित व्हावे, असा आदेश काढला. तसेच मार्केटाची देखभाल कोण करणार, तेथील जागावाटप लॉटरी पद्धतीने केले जाईल, तेथे मासे विक्रेत्यांसह पूर्वीच्या भाजी, फळे, नारळ विक्रेत्यांनाही सामावून घेतले जाईल, मार्केट आराखड्यामध्ये गरजेनुसार बदल करण्यात येईल वगैरे गोष्टी स्पष्ट करण्यात आल्या होत्या.

सध्या ज्या जागेवर मासे विक्री करण्यात येत आहे, ती जागा २८ डिसेंबरपर्यंत खाली करून मासळी विक्रेत्यांनी आपले साहित्य नवीन मार्केटात न्यावे असे आदेशात म्हटले होते. २९ पासून नवीन मार्केटात मासे विक्री करण्यासंबंधीही निर्देश देण्यात आले होते. त्यामुळे वास्कोवासिय सुखावले होते. मासळी मार्केट २९ पासून सुरू होणार या प्रतीक्षेत लोक होते.

परंतु सोमवारी मार्केट सुरू झाले नाही की मासळी विक्रेत्यांनी आपली जुनी जागा खाली केली नाही. त्यामुळे त्या मासळी विक्रेत्यांनी पालिकेसमोर आव्हान उभे केली काय असा प्रश्‍न उपस्थित होत आहे. मार्केटात स्थलांतर करण्यासंबंधी मासळी विक्रेत्यांनी पालिकेशी कोणताही संपर्क साधला नाही. त्यामुळे ते आदेशासंबंधी गंभीर नसल्याचे दिसून येते.

याबाबत नगराध्यक्ष बोरकर यांना विचारले असता, मासळी विक्रेत्यांच्या काही अडचणी होत्या, तर त्यांनी आमच्यासमोर मांडल्या पाहिजे होत्या असे स्पष्ट केले. मासळी विक्रेत्यांनी काहीच प्रतिसाद दिला नाही, त्यामुळे आम्ही आणखी दोन दिवस वाट पाहणार असल्याचे बोरकर यांनी सांगितले.