नेत्रावळी अभयारण्यातील साळजिणी येथील जंगलात शिकारीसाठी गेल्याच्या संशयावरून गुन्हा नोंदविण्यात आलेल्या १६ कदंब कर्मचाऱ्यांना महामंडळाच्या व्यवस्थापकीय संचालकांनी कारणे दाखवा नोटीस बजावली होती.

या नोटिशीला कर्मचाऱ्यांनी उत्तरे देऊन आठवडा लोटला तरी कारवाईबाबत अजून निर्णय झालेला नाही. वन खात्याने गुन्हा नोंदवून सखोल चौकशी चालवली असताना महामंडळ मात्र या प्रकरणाबाबत अजूनही गंभीर नसल्याचे दिसून येत आहे.

या १६ कदंब कर्मचाऱ्यांना अटक केल्‍यानंतर त्वरित जामीन मिळाल्याने कदंब वाहतूक महामंडळाने या गुन्ह्याकडे गंभीरतेने पाहिले नव्हते. त्यांना कोणताही जाब न विचारता सेवेत लगेच रुजू करून घेतले होते. वन खात्याने गुन्हा नोंदवून चौकशी सुरू केल्यानंतर काही धक्कादायक माहिती पुढे आली होती. ते सहलीसाठी नव्हे तर शिकारीसाठीच गेल्याचे घटनास्थळी सापडलेल्या हत्यारांवरून प्रथमदर्शनी स्‍पष्‍ट झाले होते.

हे प्रकरण वन खात्याने गांभीर्याने घेतल्याने या घटनेच्या दोन आठवड्यांनंतर महामंडळाने आपल्‍या कर्मचाऱ्यांना कारणे दाखवा नोटीस बजावून सात दिवसांत उत्तर देण्यास सांगितले होते. सर्वांनी त्यास उत्तर दिले आहे. मात्र, पुढील कारवाईसाठी पावले उचलण्यास महामंडळ संचालकांची बैठकच आयोजित करण्यास विलंब होत आहे.

लवकरच योग्‍य निर्णय : डेरिक नेटो

या १६ कदंब कर्मचाऱ्यांनी दिलेली उत्तरे समाधानकारक नसल्यास योग्य ती कारवाई केली जाईल, असे दोन आठवड्यांपूर्वी कदंब महामंडळाचे अध्यक्ष उल्हास तुयेकर यांनी सांगितले होते. व्यवस्थापकीय संचालक गोव्याबाहेर आहेत.

ते परतल्यावर लगेच बैठक घेऊन निर्णय घेऊ, असेही त्‍यांनी स्‍पष्‍ट केले होते. परंतु ते गोव्यात येऊन आठवडा उलटला तरी अजूनही या प्रकरणावर चर्चा झालेली नाही. यासंदर्भात व्यवस्थापकीय संचालक डेरिक नेटो यांच्याशी संपर्क साधला असता त्यांनी यास दुजोरा दिला. लवकरच संचालकांच्या बैठकीत चर्चा करून योग्य तो निर्णय घेतला जाईल, असे त्यांनी सांगितले.