पणजी: पंतप्रधान नरेंद्र मोदी ‘नवभारत’ निर्माण करण्यासाठी प्रयत्नशील आहेत. मात्र त्‍यासाठी युवकांचा पुढाकार महत्वाचा आहे. जगासाठी आपण विविध गोष्टी तयार करूया. हा देश ‘विश्‍वगुरु’ होण्याकडे वाटचाल करत आहे आणि ती शक्ती जर कोण असेल तर ते माझ्यासमोर बसलेले युवक होय. हा विज्ञान चित्रपट महोत्सव तुम्‍हांला अनेक बाबतीत प्रेरित व प्रोत्‍साहित करेल, असे प्रतिपादन मुख्यमंत्री डॉ. प्रमोद सावंत यांनी केले.

सातव्‍या भारतीय विज्ञान चित्रपट महोत्सवाच्‍या उद्‌घाटनप्रसंगी मुख्‍यमंत्री बोलत होते. व्‍यासपीठावर इस्त्रोचे डॉ. टी. पी. दास, जयंत सहस्त्रबुद्धे, सागर साळकर व गोवा विद्यापीठाचे कुलगुरू प्रो. हरिलाल मेनन उपस्थित होते.

तुम्ही विद्यार्थी भाग्यवान आहात कारण तुम्‍हाला विज्ञान चित्रपट महोत्सव पाहायला मिळत आहे. त्यासाठी सर्वात प्रथम गोवा विज्ञान परिषदेचे अभिनंदन. देशातील कित्येक विद्यार्थी विज्ञान चित्रपट पाहण्यासाठी आतुरलेले असतात. मात्र आम्ही गोमंतकीय खूप नशिबवान आहोत की 2015 पासून आम्हाला हा महोत्‍सव अनुभवायला मिळत आहे, असे मुख्‍यमंत्री म्‍हणाले.

देशाची मोठी प्रगती: गोव्यातील विद्यार्थ्यांना आपल्या देशात विज्ञानाचा विकास कसा होतोय आणि विज्ञान आपण कसे आत्मसात केले पाहिजे याचा परिचय करून देण्याचा प्रयत्न होतोय. विज्ञान तंत्रज्ञान क्षेत्रात गेल्या 75 वर्षांत आपल्या देशाने मोठा विकास केला, पण अजून देश विज्ञान तंत्रज्ञानाच्या क्षेत्रात स्वावलंबी, आत्मनिर्भर व्हायचा आहे. त्या दिशेने आपल्याला वाटचाल करायची आहे, असे जयंत सहस्त्रबुद्धे म्हणाले. तर, सागर साळगावकर म्हणाले, विज्ञान आपल्या जीवनाचा भाग आहे.