पैरा-मये खाणीवर रात्रीचे ‘कारनामे’!

डिचोली: ई-लिलाव खनिज वाहतुकीचा प्रश्न तापल्यानंतर पैरा-मये येथील खाणीवर रात्रीच्या वेळी बेकायदा कारनामे सुरू असल्याची माहिती समोर येत आहे. या खाणीवर बेकायदेशीरपणे खनिज उत्खनन करण्यात

येत असून, मध्यरात्री लोक गाढ झोपेत असताना खनिज वाहतूक करण्यात येत आहे, असा दावा मयेतील काही जागृत नागरिकांनी केला आहे. बेकायदा खनिज उत्खनन करून त्याची चोरट्या मार्गाने वाहतूक करणे म्हणजे सरकारचा महसूल बुडविणे होय, असा आरोपही नागरिकांनी केला आहे. पैरा-मये येथील खाणीवर आज मंगळवारी सायंकाळी काही जागृत नागरिकांनी जाऊन पाहणी केली असता, तेथे यंत्रसामग्री, खनिज वाहतूक करणारे ट्रक आणि खनिज उत्खनन केल्याच्या खाणाखुणा आढळून आल्या.

..तर पुन्‍हा रस्‍त्‍यावर उतरावे लागेल!

ई-लिलावाच्या खनिज वाहतुकीवरून काही दिवसांपूर्वी मये गावात वातावरण तापले होते. गावातून नियमबाह्य खनिज वाहतूक होत असल्याचा आरोप करून किमान पाच ते सहावेळा नागरिकांनी रस्त्यावर उतरून वाहतूक रोखण्याचा प्रयत्न केला होता. आता रात्रीच्या वेळी खनिज उत्खनन करून त्याची रात्रीच वाहतूक करण्यात येत असल्याने नागरिक आश्चर्य व्यक्त करीत आहेत. सरकारने वेळीच हा प्रकार रोखला नाही तर या बेकायदेशीर कृत्याविरोधात पुन्हा रस्त्यावर उतरणे भाग पडेल, असा इशारा काही नागरिकांनी दिला आहे.