मडगाव :  नावेली येथील एडबर्ग पेरेरा या ३७ वर्षीय युवकाला  मारहाण केल्‍याचे प्रकरण अंगावर शेकण्याची दाट शक्यता असलेला हवालदार मिंगेल वाझ  आता आजारी सुट्टीवर गेला आहे. आरोग्याची  समस्या उद्‍भवल्याने  त्याने  ही सुट्टी घेतली आहे, असे त्‍याने आपल्‍या अर्जात म्‍हटले आहे.

या मारहाणप्रकरणी वाझ  व पोलिस शिपाई अजय जांगळी या दोघांवर शिस्तभगांची कारवाई सुरू असून त्यांची दक्षिण गोवा पोलिस अधिक्षक राखीव दलात  बदली करण्‍यात आली आहे. या पार्श्वभूमीवर अचानक तो रजेवर गेल्याने या मारहाण प्रकरणाचे गूढ वाढले आहे.

या मारहाण प्रकरणी सीसीटीव्ही कॅमेऱ्यात नावेली येथे एडबर्गला मारहाण करताना त्या दोघांची छबी बंदिस्त झाली होती.  त्यानंतर एडबर्गला मडगाव पोलिस ठाण्यात आणून पायात बेड्या ठोकून त्याला बेदम मारहाण केली होती. यात तो गंभीर जखमी झाला होता. नंतर त्याला उपचारासाठी गोमेकॉत दाखल केले होते. २२ ऑक्टोबरला मारहाणीची ही घटना घडली होती.

 दै. ‘गोमन्तक’ने या मारहाण प्रकरणाला वाचा फोडली होती. मागाहून उपनिरीक्षक नीलेश शिरवईकर  याला सेवेतून निलंबित केले होते. त्याच्यावर  बीएनएसच्या कलम ११७ , १९८ अंतर्गत गुन्हा नोंद झाला आहे. 

एडबर्ग प्रकृती चिंताजनक

एडबर्ग याच्यावर अजूनही गोमेकॉत उपचार चालू आहे. त्याच्यावर शस्त्रक्रियाही  झाली असून अजूनही त्याची प्रकृती चिंताजनक आहे.  सामाजिक कार्यकर्त्या प्रतिमा कुतिन्हो व अन्य  सामाजिक कार्यकर्त्यांनी नंतर दक्षिण गोवा पोलिस  मुख्यालयात मोर्चा काढून दोषी पोलिसांना बडतर्फ करून कारवाई करण्याची मागणी केली होती.