मडगाव: तळावली-नावेली येथील प्रभाग क्रमांक एकमध्ये रविवारी (दि.७) रात्री एका घराला भीषण आग लागून दोन घरगुती सिलिंडरचा स्फोट झाला. ही घटना सायंकाळी साडेसातच्या सुमारास घडली.

सुदैवाने या घटनेत कोणतीही जीवितहानी झाली नाही, मात्र घरातील लाखोंची मालमत्ता जळून खाक झाली आहे. दरम्यान, मडगाव अग्निशमन दलाच्या जवानांनी तात्काळ घटनास्थळी धाव घेत आग विझवली आणि लाखो रुपयांची मालमत्ता वाचवण्यात यश मिळवले.

प्रकाश परवार यांच्या मालकीचे हे घर असून, घराच्या मागील बाजूस पाणी गरम करण्यासाठी चुलीत आग पेटवली होती. परवार आणि त्यांचे कुटुंबीय घरात नसताना ही आग अचानक इतरत्र पसरली आणि घराच्या लाकडी वाशांनी पेट घेतला. आग वेगाने पसरत असतानाच घरातील दोन भरलेल्या सिलिंडरचा मोठा स्फोट झाला. या घटनेमुळे परिसरात एकच खळबळ उडाली.

आग लागल्याची माहिती मिळताच मडगाव अग्निशमन दलाचे अधिकारी गिल सोझा यांच्या नेतृत्वाखालील पथकाने तातडीने घटनास्थळी धाव घेतली. जवानांनी पाण्याचा मारा करत आग विझवण्यास सुरुवात केली. सर्वात महत्त्वाचे म्हणजे, त्यांनी प्रसंगावधान राखत घरातील आणखी दोन भरलेले सिलिंडर बाहेर काढले, ज्यामुळे पुढील मोठा स्फोट आणि अनर्थ टळला. सध्या आग पूर्णपणे नियंत्रणात आणण्यात आली असून, आग नेमकी कशामुळे लागली, याचा तपास सुरू आहे.