पणजी: गोव्याची शुगर बनारसे हीने राष्ट्रीय खुल्या सर्फिंग स्पर्धेत महिला गटात पदकाची संधी आहे. तिने अंतिम फेरी गाठली असून पदकासाठी कर्नाटक व तमिळनाडूच्या सर्फर्सचे आव्हान मागे सारावे लागेल. स्पर्धा मंगळूर येथील पानांबूर बीचवर सुरू आहे. महिलांच्या खुल्या गटात पर्वरी येथील शुगर हिच्यासह यजमान कर्नाटकची इशिता मालविय व सिंचना गौडा, तमिळनाडूची सृष्टी सेल्वम यांनीही अंतिम फेरी गाठली आहे. भारतीय सर्फिंग महासंघातर्फे स्पर्धा घेण्यात आली आहे. (National Open Surfing Competition )

सुवर्णपदकाची दावेदार

प्राथमिक फेरीतील कामगिरीच्या आधारे 16 वर्षीय शुगर महिलांत सुवर्णपदकाची दावेदार आहे. तिने स्पर्धेतील सर्व पंचांना प्रभावित करणारी कामगिरी बजावली व सर्वाधिक गुणांची कमाई केली. अंतिम फेरी गाठलेल्या महिलांत शुगरने 11.27, सृष्टीने 10.37, इशिताने 6.17, तर सिंचना हिने 7.30 गुण नोंदविले. महिलांच्या खुल्या गटासह शुगरने 16 वर्षे व खालील वयोगटातही अंतिम फेरी गाठली आहे.

सर्वोत्तम कामगिरीसाठी प्रेरित

स्पर्धेची अंतिम फेरी गाठल्यानंतर शुगरने आपण सर्वोत्तम कामगिरीसाठी प्रेरित असल्याचे सांगितले. ती म्हणाली, ‘‘अंतिम फेरीत जागा पटकावल्याने मी आनंदी आहे. सृष्टी सेल्वम ही गतविजेती आहे. प्रतिस्पर्ध्यांचे आव्हान खडतर असल्याची जाणीव आहे, तरीही मी सज्ज आहे आणि उद्या सर्वोत्तम सर्फ करण्याची आशा बाळगून आहे. आम्हाला जास्त स्पर्धात्मक अनुभव मिळावा या हेतूने ही स्पर्धा घेतल्याबद्दल मी भारतीय सर्फिंग महासंघाचे आभार मानते. भविष्यातील प्रशिक्षण आणि आंतरराष्ट्रीय स्पर्धा लक्षात घेता खूप फायदा झाला आहे.

गतवर्षी रौप्यपदकाची मानकरी

गतवर्षी तमिळनाडूतील कोवालम बीचवर झालेल्या राष्ट्रीय सर्फिंग स्पर्धेत महिलांच्या खुल्या गटात शुगरने रौप्यपदक मिळविले होते. तमिळनाडूची सृष्टी सेल्वम सुवर्णपदकाची मानकरी ठरली होती.