डिचोली: मेगा प्रकल्पाच्या प्रश्नावरून नार्वे पंचायतीची झालेली ग्रामसभा काहीसी तापली. यापुढे ग्रामसभेची मान्यता घेतल्याशिवाय कोणत्याही मेगा प्रकल्पाला ग्रामसभेने परवानगी देवू नये, असे ग्रामस्थांनी स्पष्ट करीत तसा ठरावही ग्रामसभेत घेतला. ‘एमडीआर’ अंतर्गत गावातील रस्त्यांच्या मेगा रुंदीकरणालाही ग्रामस्थांनी विरोध केला.

नार्वे पंचायतीची ग्रामसभा आज (रविवारी) सरपंच तुकाराम गावडे यांच्या अध्यक्षतेखाली पार पडली. या ग्रामसभेस उन्नती पडोलकर यांच्यासह संदेश पार्सेकर सिद्धेश पार्सेकर आणि सिद्धी नाईक हे पंचसदस्य उपस्थित होते. सरपंचांनी स्वागत केल्यानंतर पंचायत सचिवांनी मागील ग्रामसभेचे इतिवृत्त सादर केले. या ग्रामसभेत रस्ते रुंदीकरणाच्या विषयावर चर्चा झाली. गावच्या लोकसंख्येचा विचार करता, सध्याचे रस्ते पूरक आहेत. असा दावा ग्रामस्थांनी करून ''एमडीआर'' अंतर्गत रस्ते रुंदीकरणाला ग्रामस्थांनी विरोध केला. ‘गंगा घाट आरती’ प्रकल्पासह बेवारस गुरांचा विषय आदी प्रश्न चर्चेत आले. माजी सरपंच लक्ष्मण मालवणकर, नामदेव मालवणकर, मिलिंद बर्वे आदी ग्रामस्थांनी उपस्थित केलेल्या शंकांचे पंचायतीने निरसन केले. संदेश पार्सेकर यांनी आभार मानले.

घाट आरती प्रकल्प होणारच

ग्रामसभेत नार्वे गावात पंचगंगेच्या तीरावरील नियोजित गंगा घाट आरती प्रकल्प होणारच. हा प्रकल्प व्हावा. यासाठी आमदार प्रेमेंद्र शेट यांच्यासह मुख्यमंत्री डॉ. प्रमोद सावंत आग्रही आहेत. पंचायतीचाही प्रकल्पाला पाठिंबा आहे. त्यामुळे या प्रकल्पाबाबतीत वाद नाही, असे सरपंच तुकाराम गावडे यांनी स्पष्ट केले. नियोजित प्रकल्पाला जर व्यत्यय आणण्याचा प्रयत्न केल्यास, संबंधितांवर कायदेशीर कारवाई होणार, असे पंचसदस्य संदेश पार्सेकर यांनी स्पष्ट केले.