पणजी : मये मतदारसंघातील नार्वे येथील फेरी धक्क्याच्या दुरुस्तीला सात वर्षांत सार्वजनिक बांधकाम खात्याला (साबांखा) मुहूर्त मिळेना झाला आहे. या कामाविषयी दोनवेळा अंदाजित रक्कम बदलण्यात आली. तरीही हे काम मार्गी लागेना झाले आहे. २०१७ मध्ये या कामाची काढलेली १६ लाख ४७ हजारांची निविदा निघाली. परंतु त्यानंतर साबांखाने याच कामाची अंदाजित रक्कम गतवर्षी ४७ लाख ३१ हजारांवर नेली.

narve construction fund amount scam panajim Mayem constituencies

नदी परिवहन खात्याने त्यासही मंजुरी दिली. परंतु निविदा काढण्यावर आतापर्यंत झालेल्या चालढकलीमुळे हे काम सुरू होणार की नाही, याविषयी नार्वेतील ग्रामस्थ चिंताग्रस्त आहेत. सरकारी पातळीवरील अशा वेळकाढू धोरणाला कोण कारणीभूत आहेत, त्यांच्याविरोधात कडक कारवाईची अपेक्षा धरणेही आता चुकीचे ठरू शकते.

हाती आलेल्या माहितीनुसार, २०१६ मध्ये नार्वे येथील फेरी धक्क्याची दुरुस्ती करावी म्हणून नदी परिवहन खात्याने सार्वजनिक बांधकाम खात्याला पत्रव्यवहार केला. त्यानुसार साबांखाने १५ लाख ४७ हजार ६२० रुपयांच्या खर्चाची अंदाजित रक्कम होईल, असे कळविले. त्यानुसार नदी परिवहन खात्याने ती रक्कम मंजूर केली. या रकमेच्या साबांखाने काढलेल्या निविदेनुसार, फोंडा येथील एका कंत्राटदारास ते काम मिळाले. चार वर्षे झाले तरी साबांखाने त्या कामाविषयी काहीच हालचाल केली नाही.

वारंवार निविदा काढूनही कामास दिरंगाई

येथील स्थानिक लोकांच्या फेरीबोट सेवेबाबात व्यवस्थापनाकडे तक्रारी वाढू लागल्यामुळे त्याची दखल घेत नदी परिवहन खात्याने सार्वजनिक बांधकाम खात्याकडे त्या कामाविषयी विचारणा केली होती. अखेर साबांखाने संबंधित कंत्राटदाराला २ फेब्रुवारी २०२१ रोजी कारणे दाखवा नोटीस बजावली. त्यानंतर सप्टेंबर २०२२ मध्ये या कामाची साबांखाने पुन्हा एकदा सुधारित रक्कम नदी परिवहन खात्याला कळविली.

त्या सुधारित रकमेनुसार ३७ लाख २८ हजार ३५७ रुपये नदी परिवहनकडून मंजूरही झाले. जानेवारी २०२३ मध्ये पुन्हा एकदा साबांखाने या दुरुस्ती कामाची अंदाजित वाढीव रक्कम ४७ लाख ३१ हाजर ५२२ रुपये होतील असे कळविले. तेही नदी परिवहन खात्याने मंजूर केले. वारंवार सुधारित अंदाजित रक्कम देण्याचे नदी परिवहन खात्याने मंजूर करूनही साबांखाकडून काम सुरू झालेले नाही.

अखेर नदी परिवहन खात्याने साबांखाला जुलै २०२३ मध्ये पत्रव्यवहार करून दिलेले काम पूर्ण होत नसेल आणि प्रवाशांचे हित पाहता आम्हाला कारवाई करावी लागेल, असा स्पष्ट इशाराच दिला आहे.