डिचोली, आंघोळीसाठी जीवघेण्या ठरलेल्या नानोड्यातील ‘त्या’ चिरेखाणीत यापुढे कोणी आंघोळ करताना आढळून आल्यास, त्यांच्या विरोधात आता कडक आणि कायदेशीर कारवाई अटळ आहे, तसा इशारा देणारा सूचना फलक डिचोली पोलिसांनी या चिरेखाणीवर लावला आहे.
स्थानिक पंच सदस्य दिलीप वरक यांच्या नेतृत्वाखाली स्थानिक युवकांनी आज चिरेखाणीवर स्वच्छता मोहीम राबवली. गेल्या रविवारी एकाच दिवशी नानोडे भागात बुडून दोन मुलांचा दुर्दैवी अंत झाला होता. भटवाडी - नानोडे येथील चिरेखाणीत एका मुलाचा बुडून अंत झाला होता.
दोन मुलांचा बुडून मृत्यू होण्याच्या नानोड्यातील दुर्दैवी घटनेनंतर सरकारी यंत्रणा जागी झाली. धोकादायक जलस्रोतांवर आंघोळीसाठी बंदी घालणारा आदेशही जारी करण्यात आला, तर नानोडे भागातील जलस्रोतांवर यापुढे कोणी आंघोळ करताना आढळून आल्यास, त्यांना अटक करा.
असे निर्देश आमदार डॉ. चंद्रकांत शेट्ये यांनी गेल्या बुधवारी डिचोलीत पार पडलेल्या आपत्कालीन व्यवस्थापन बैठकीवेळी पोलिसांना दिले होते. त्यानंतर पोलिस यंत्रणा सतर्क झाली आहे. आंघोळ करताना कोणी आढळल्यास त्यांच्या विरोधात कायदेशीर कारवाई करण्यात येईल, असा इशारा देणारी सूचनाही फलकावर नमूद करण्यात आली आहे.
चिरेखाणीवर साफसफाई
आंघोळीसाठी असुरक्षित असलेल्या नानोडेतील ‘त्या’ चिरेखाणीवर मद्याच्या बाटल्या, प्लास्टिक आदी कचरा साचला होता. पंच सदस्य दिलीप वरक आणि स्थानिक युवकांनी आज (रविवारी) चिरेखाणीवर स्वच्छता मोहीम राबवली.
चिरेखाणीवर अस्ताव्यस्त पडलेल्या मद्यासह प्लास्टिक बाटल्या आदी कचरा गोळा करून साफसफाई केली. चिरेखाणीवर सूचना फलक लावल्याबद्दल दिलीप वरक यांनी समाधान व्यक्त करून पोलिसांनी अधूनमधून गस्त चालूच ठेवावी, अशी मागणी केली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.