मडगाव: न्‍हयबाग-पेडणे येथे वाळूमाफियांच्‍या गँगमधील वैमनस्‍यातून झालेल्‍या गोळीबार प्रकरणामुळे तीन वर्षांपूर्वी बाणसाय-कुडचडे येथे झालेल्‍या अशाच प्रकारच्‍या गोळीबार प्रकरणाला उजाळा मिळाला. संपूर्ण गोवा चतुर्थीचा सण साजरा करत असताना १ सप्‍टेंबर २०२२ रोजी झालेल्‍या या गोळीबारात वाळूमाफियाकडे रोजंदारीवर काम करणारे दोन कामगार गंभीर जखमी झाले होते. त्‍यातील युसूफ आलम याला आपला जीव गमवावा लागला होता.

आपली हुकमत प्रस्‍थापित करण्‍यासाठी मुंबईत ज्‍या प्रकारे गँगवार चालू असते, त्‍याच धर्तीवर गोव्‍यातही वाळूमाफियांच्‍या टोळ्‍या एकमेकांवर कुरघोडी करू पाहत असल्‍याचे त्‍यावेळी स्‍पष्‍ट झाले होते. ही खुनाची घटना घडल्‍यानंतर गोव्‍यातील वाळूमाफियांमधील द्वंद्वाच्‍या घटना आटोक्‍यात आल्‍या असे वाटत असले तरी ते अजूनही सुरू आहे हे आजच्‍या घटनेने पुन्‍हा एकदा स्‍पष्‍ट केले आहे.

त्‍या दिवशी पंचमीचा दिवस होता. दीड दिवसाच्‍या श्री गणपतीचे सायंकाळी मोठ्या उत्‍साहात विसर्जन करण्‍याच्‍या तयारीत सर्व गोवा असताना सकाळी-सकाळीच ही खुनाची घटना लोकांसमोर येऊन धडकली होती. त्‍यामुळे फक्‍त कुडचडेच नव्‍हे तर संपूर्ण गोवा सुन्न झाला. त्‍या दिवशी पहाटे बेकायदेशीर वाळू उत्‍खनन सुरू असताना झालेल्‍या गोळीबारात एका बिगरगोमंतकीय कामगाराला आपला जीव गमवावा लागला होता.

या प्रकरणातील मुख्‍य आरोपीला पकडण्‍यासाठी पोलिसांना बराच काळ लागला होता. तीन वर्षांपूर्वी झालेल्‍या या खुनाच्‍या घटनेमुळे गोव्‍यात वाळूमाफियांमधील वैमनस्‍य कोणत्‍या थरावर पोचले आहे याचा प्रत्‍यय आला होता. या वाळूमाफियांना राजकीय आशीर्वाद असल्‍यामुळेच ते या पातळीपर्यंत पोहोचू शकले हेही त्‍यातून पुढे आले होते.

१ सप्‍टेंबर २०२२ रोजी बाणसाय-कुडचडे येथे असे काय झाले, त्‍यामुळे एका कामगाराला आपला जीव गमवावा लागला? त्‍या काळात सावर्डे व कुडचडे परिसरात बेकायदा वाळूमाफियांनी उच्‍छाद मांडला होता. रात्रीचे सगळे झोपले असताना सावर्डे, कुडचडे भागातून वाहणाऱ्या झुवारी नदीच्‍या दोन्‍ही काठांवर मोठ्या प्रमाणावर बेकायदेशीर वाळूउत्‍खनन चालायचे. सक्‍शन पंप लावून झुवारी नदीचा काठ वाळूमाफियांनी पोखरून काढला होता. या व्‍यवसायावर कोणाची हुकमत असावी यासाठी दोन गटांमध्‍ये चढाओढ सुरू होती. त्‍यातूनच ही घटना घडली होती.