Nagpur-Goa Highway: गेल्या काही काळापासून चर्चेत असलेल्या नागपूर-गोवा हायवेबाबत एक नवीन अपडेट समोर येत आहे. या हायवेद्वारे आता महाराष्ट्रातील साडेतीन शक्तीपीठे असलेली तीर्थस्थळे जोडली जाणार आहेत. त्यामुळे या मार्गावर आधी तीर्थाटन आणि नंतर गोव्यात पर्यटन, अशी अनुभूती पर्यटकांना, प्रवाशांना घेता येणार आहे.

नागपूर-गोवा हे सुमारे एक हजार किलोमीटरचे अंतर आहे. नागपूरला गोव्याशी जोडणाऱ्या या महामार्गाला नागपूर-गोवा ग्रीनफील्ड सुपरफास्ट हायवे असे नाव देण्यात आले आहे. एरवी नागपूर-गोवा या प्रवासासाठी 24 तासांचा कालावधी लागतो. पण आता या नव्या हायवेमुळे नागपूर-गोवा प्रवासाचा हा वेळ 11 तासांवर येणार आहे.

त्यामुळे प्रवाशांची, पर्यटकांची सोय होणार आहे. शिवाय नागपूर हे मध्यभारतातील महत्वाचे ठिकाण आहे. त्यामुळे थेट मध्य भारतातून गोव्यात येण्याच्या दृष्टीनेही हा महामार्ग महत्वाचा ठरणार आहे.

विशेष म्हणजे, या महामार्गात भाविकांची श्रद्धास्थाने असलेली महत्वाची तीर्थस्थळे जोडली जाणार आहेत. साडेतीन शक्तीपीठे म्हणून ओळखली जाणार तुळजापूरची भवानीमाता, माहुरची रेणूकादेवी, नाशिकच्या वणीतील सप्तश्रृंगीदेवी आणि कोल्हापुरची अंबाबाई ही साडेतीन शक्तीपीठे या महामार्गातून जोडली जाणार आहेत.

त्यादृष्टीनेही हा महामार्ग महत्वाचा ठरणार आहे. कोल्हापुरातून पुढे सिंधदुर्गात कुणकेश्वर आणि गोव्यातील पत्रादेवी ही ठिकाणेही या महामार्गावर असणार आहेत. त्यामुळे एक प्रकारे धार्मिक पर्यटनाचे पॅकेज या महामार्गातून साकारले जात आहे.

याशिवाय महाराष्ट्रातील मराठवाडा आणि विदर्भ हे प्रांतदेखील प्रवासाच्या दृष्टीने अधिक जवळ येणार आहेत. हा महामार्ग महाराष्ट्रातील 13 जिल्ह्यांतून जाणार असून त्यासाठी सुमारे 70 हजार कोटी रूपये खर्च प्रस्तावित आहे.