सत्तरीतील नगरगाव पंचायत क्षेत्रात गेल्या पंधरा दिवसांपासून विजेची समस्या उग्र बनली आहे. त्‍यामुळे नागरिक संतप्त बनले आहेत. काल शुक्रवारी रात्रभर क्षणाक्षणाला विजेचा लपंडाव सुरू होता. किमान शंभरहून अधिक वेळा तरी वीज आली आणि गेली.

नगरगाव पंचायत क्षेत्रात धावे, उस्ते, बांबर, नानोडा, माळोली, साट्रे, देरोडे, कोदाळ या गावांना विजेच्या लपंडावाचा प्रचंड त्रास सहन करावा लागत आहे. आज शनिवारीही सायंकाळी विजेचा लपंडाव सुरूच होता. या गावात बंच वीज केबल घातलेल्या आहेत, पण त्या वारंवार जळत आहेत.

दर पाच मिनिटांनी वीज येते आणि पुन्हा जाते. फोन करून विचारणा केली तर ‘फिडर नादुरुस्त आहे’ असे साचेबद्ध उत्तर दिले जाते. जो बंच केबल घालण्यात आला आहे, तो पूर्णतः निकृष्ट दर्जाचा असल्यामुळे ही समस्‍या वारंवार उद्‌भवत आहे.

चार दिवसांपूर्वी वेळगे ग्रामस्थांनी वीज खात्याच्या कार्यालयावर धडक मोर्चा नेला होता. माळोलीतील लोकांनीही धडक दिली होती.