पणजी: कोट्यवधी रुपयांच्या गुंतवणूक घोटाळ्यातील कथित मुख्य आरोपी मायरन रॉड्रिग्ज याची पहिली पत्नी सुनीता रॉड्रिग्ज (Sunita Rodrigues) हिला गोवा पोलिसांच्या गुन्हे शाखेने शनिवारी (7 डिसेंबर) अटक केली. गुंतवणुकीवर भरघोस परतावा देण्याच्या बहाण्याने मायरन आणि त्याच्या साथीदारांनी गुंतवणूकदारांची कोट्यवधींची फसवणूक केली.

दरम्यान, सुनीताचा या फसवणुकीमध्ये सक्रिय सहभाग असल्याचे तसेच घोटाळ्यात महत्त्वाची भूमिका बजावल्याचे तपासात उघड झाल्यानंतर तिला अटक केल्याची माहिती पोलिसांनी दिली. तिला चौकशीसाठी बोलावले असतानाही ती टाळाटाळ करीत होती. अखेर सुनीताला अटक करण्यात आली.

क्राईम ब्रांचकडे तपास

शेअर मार्केटमध्ये (Share Market) आर्थिक गुंतवणुकीद्वारे भरमसाट व्याज देण्याचे आमिष दाखवून मायरन आणि त्याच्या टीमने गोव्यातील सुमारे 50 गुंतवणूकदारांना 130 कोटींचा गंडा घातला. आता या प्रकरणाचा तपास आर्थिक गुन्हे कक्षाकडून क्राईम ब्रांचकडे वर्ग करण्यात आला आहे. या प्रकरणाशी संबंधित असलेला मुद्देमाल तसेच दस्तावेज त्वरित क्राईम ब्रांचकडे देण्याचा आदेश पोलिस उपमहानिरीक्षक वर्षा शर्मा यांनी काढला.

दुसरीकडे, गुंतवणूकदारांची (Investors) रक्कम आयडिलिक गोवन गेटवेज ॲण्ड डेव्हलपमेंट्स प्रा. लि. कंपनीत गेल्याने या कंपनीच्या नोलान लॉरेन्स आंताव (फातोर्डा), ज्योकिम रोझारिओ पिरीस (फातोर्डा), विजय दत्तात्रय जोईल (सिंधुदुर्ग-महाराष्ट्र), नावनिक मारिओ पेरेरा (बाणावली) आणि सुशांत मनोहर घोडगे (पेडणे) यांच्याविरुद्ध आर्थिक गुन्हा कक्षाने गुन्हा दाखल केला आहे.