JEE Advance आयआयटी, एनआयटी, आयआयआयटीसह इंडियन इन्स्टिट्यूट ऑफ सायन्स या संस्थांमध्ये प्रवेशासाठी महत्त्वाच्या मानल्या जाणाऱ्या संयुक्त प्रवेश परीक्षेचा (जेईई ॲडव्हान्स) निकाल रविवारी जाहीर झाला.

यात मुष्टिफंड आर्यन उच्च माध्यमिकच्या १६ विद्यार्थ्यांनी गुणवत्ता यादीत स्थान मिळविले, तर ‘बिटसॅट’च्या दुसऱ्या प्रयत्नात चार विद्यार्थ्यांनी गुणांमध्ये सुधारणा केली.

याविषयी माहिती देताना मुष्टिफंड आर्यनचे प्राचार्य व्यंकटेश प्रभुदेसाई म्हणाले की, जेईईच्या अखिल भारतीय रँकिंगमध्ये (एआयआर) अदीप कुंकळ्येकर याने १,५७६ वे स्थान पटकावले आहे. अदीपने ३६० पैकी २०१ गुण मिळवले.

गेल्या वर्षी आशिष झांट्येने ३६० पैकी १९९ गुण मिळवले होते. रँकिंगचा विचार केला तर आर्यनचे पहिल्या ५ हजार एआयआरमध्ये पाचजण आणि पहिल्या दहा हजार एआयआरमध्ये १२ विद्यार्थी आलेले दिसतात. तर वरील चारजण २० हजार एआयआरमध्ये आलेले आहेत.

अत्यंत कठीण असलेल्या या परीक्षेमध्ये यशाचे सातत्य राखल्याबद्दल प्राचार्य प्रभुदेसाई यांनी शिक्षक आणि विद्यार्थ्यांचे अभिनंदन केले. दरवर्षी गोव्यातून साधारण ५० विद्यार्थी जेईई ॲडव्हान्सला परीक्षेला बसतात.

मुख्य परीक्षेचा निकाल झाल्यानंतरच किती विद्यार्थी गोव्यातून पात्र ठरले होते ही संख्या कळते, असे प्रभुदेसाई यांनी सांगितले. ‘बिटसॅट’चा दुसरा प्रयत्न सुरू झाला.

पहिल्या दिवशीच ४ विद्यार्थ्यांनी गुण सुधारले. ते विद्यार्थी असे : मुकुंद काकोडकर (२८६), श्रेयस चव्हाण (२८५), इशान भाटे (२३८), प्रभाव उप्पर (२३६).