मडगाव : मडगावसह (Margao) संपूर्ण राज्याला एका वर्षांपूर्वी हादरवून सोडणाऱ्या स्वप्नील वाळके खून प्रकरणातील 5 संशयितांविरुद्ध दक्षिण गोवा अतिरिक्त सत्र न्यायालयाने आरोप निश्चित केल्याने या प्रकरणी आता साक्षी पुरावे नोंदवून घेण्यास सुरुवात होणार आहे. या प्रकरणातील सर्व संशयितांनी आपल्यावरील आरोप नाकारले. 1 डिसेंबरपासून या प्रकरणी नियमित सुनावणी (Crime) होणार आहे.

2 सप्टेंबर 2020 या दिवशी ही घटना घडली होती. मडगावातील युवा सराफ वाळके यांच्या दुकानात शिरून त्यांच्यावर गोळीबार करून त्यांची हत्या केली होती. चोरीच्या उद्देशाने हा सशस्त्र दरोडा घातल्याचा पोलिसांचा दावा असून या प्रकरणी सध्या अतिरिक्त सत्र न्यायाधीश चोलू गावस यांच्यासमोर सुनावणी चालू आहे. दरम्यान या प्रकरणातील सहावा संशयित कुंदन कुमार हा सुनावणीस गैरहजर राहिल्याने त्याच्या विरुद्ध अजामीनपात्र अटक वॉरंट जारी करण्यात आले आहे.

या प्रकरणी मुस्तफा शेख, ओंकार पाटील आणि इव्हेंडर रोड्रिग्स यांच्या विरोधात भादंसंच्या 302 (हत्या), 398 (सशस्त्र दरोडा), 201 (पुरावे नष्ट करण्याचा प्रयत्न) व 120 ब (गुन्हेगारी कट कारस्थान) तसेच शस्त्र प्रतिबंधक 3 व 25 कलमाखाली आरोप निश्चित करण्यात आले. तर सनी कुमार, राहुल कुमार या दोन बिहारी संशयितावर हा गुन्हा करण्यासाठी शस्त्र पुरविण्याचा आरोप निश्चित केला.

या प्रकरणाची पार्श्वभूमी अशी की मुस्तफा, ओंकार आणि इव्हेंडर या तिघांनी वाळके यांच्या मालकीच्या सराफी दुकानात जाऊन दरोडा घालण्याचा कट रचला त्यानुसार 2 सप्टेंबर रोजी संशयित गाडी घेऊन मडगावात आले. त्यापैकी मुश्ताफा दुकानात शिरून त्याने स्वप्निलवर गोळी झाडली. यावेळी स्वप्नीलने प्रतिकार करण्याचा प्रयत्नही केला. मात्र रक्तस्राव सुरू झाल्याने त्याचे निधन झाले.

या प्रकरणी जे पिस्तुल वापरण्यात आले होते ते बिहारमध्ये जाऊन आरोपींनी विकत आणले होते. तपास करणाऱ्या क्राईम ब्रँचने हे पिस्तुल पुरविणाऱ्या तिघांना अटक केली होती. या प्रकरणी क्राईम ब्रँचने 1200 पेक्षा अधिक मुद्देमालाची यादी जोडणारे आरोपपत्र याआधी सादर केले असून 111 साक्षीदारांची यादी बरोबर जोडली आहे.