मडगाव: मुंगूल गॅंगवॉर प्रकरणात कुख्यात गँगस्टर लॉरेन्स बिष्णोई याचा संबंध असल्याचे आतापर्यंतच्या पोलिस तपासात उघड झाले असल्याने या गॅंगवॉरच्या मुळापर्यंत जाण्यासाठी पोलिसांनी कंबर कसली आहे.

बिष्णोई गँगचा ओमसा हा सध्या फातोर्डा पोलिसांच्या कोठडीत असून, त्याच्या कॉल डिटेल्सची तपासणी पोलिसांनी सुरू केली आहे. तो कुणाच्या संपर्कात होता याची माहिती पोलिस घेत आहेत. दरम्यान, बिष्णोई गँगचा हस्तक पवन सोळंकीच्या मुसक्या आवळण्यासाठी पोलिसांनी सापळा रचला आहे.

हे प्रकरण आता बिष्णोई गँगशी संबंधित असल्याने पोलिसांनी cबाळगली आहे. देशातील अन्य राज्यातील पोलिसांना सतर्क करण्यात आले आहे, अशी माहिती एका वरिष्ठ पोलिस अधिकाऱ्याने नाव गुपित ठेवण्याच्या अटीवर दिली.

पोलिसांच्या हाती इंस्ट्रग्रामवर अपलोड झालेले काही व्हिडिओ लागले आहेत. त्यातून मुंगूल गॅंगवॉरची सुपारी बिष्णोई गँगने घेतली होती, असे उघड होऊ लागले आहे.

गोव्यात गुन्हेगारी विश्वात आपले वर्चस्व ठेवण्यासाठी हे गॅंगवॉर झाले होते. १२ ऑगस्ट रोजी गॅंगवॉरची ही घटना घडली होती. हा सर्व पूर्वनियोजित कट होता.

वॉल्टर गॅंगचे यवकेश सिंग व रफिक तशान या दोघांवर प्राणघातक हल्ला केला होता. त्यात ते दोघेही गंभीर जखमी झाले होते.

या प्रकरणात पोलिस सध्या अमोघ नाईक व वेली या दोघांच्या शोधात आहे. त्यांना अटक केल्यानंतर या प्रकरणाचा संपूर्ण सोक्षमोक्ष लागणार आहे, आतापर्यंत या टोळीयुद्धात २३ जणांना पोलिसांनी अटक केली आहे.