मडगाव: मुंगुल टोळीयुद्ध प्रकरणात एका मटका एजंटाचाही सहभाग होता, असे आता उघड झाले आहे. राजेश हेलमा असे त्याचे नाव असून त्याची बोलेनो कार पोलिसांनी जप्त केली आहे. कुख्यात गँगस्टर लॉरेन्स बिष्णोई याचे कनेक्शन उघड झाल्यानंतर या प्रकरणाची व्याप्ती वाढली असून या गॅंगवॉरात  सहभागी झालेले अनेकजण  आता भूमीगत झाले आहेत.  

१२ ऑगस्ट रोजी टोळी युद्धाची ही घटना घडली होती. हा सर्व पूर्वनियोजित कट होता. वॉल्टर गॅंगचे युवकेश सिंग व रफिक तशान या दोघांवर प्राणघातक हल्ला केला होता. त्यात ते दोघेही गंभीर जखमी झाले होते.  

बिष्णोई गँगचा ओमसा याला पोलिसांनी अटक केली आहे तर पवन सोळंकी याच्या मागावर पोलिस आहेत. पोलिस सध्या ओमसाच्या मोबाईल कॉलची पडताळणी करीत असून अनेक महत्त्वाचे धागेदोरे पोलिसांना सापडले आहेत. 

हेलमा हा मूळ आंध्र प्रदेशातील असून तो नेसाय येथे राहतो. तो वेल्ली गँगचा सदस्य आहे. वेल्ली ही अजून फरार आहे. आतापर्यंत फातोर्डा पोलिसांनी या प्रकरणी २३ जणांना अटक केली असून यातील दीपक कट्टमणी याला न्यायालयाने सशर्त जामीन मंजूर केला आहे. 

दोघांचे अटकपूर्व जामिनासाठी अर्ज

दरम्यान, पोलिस शोधात असलेला अमोघ नाईक हा अजूनही फरार असून त्याने अटकपूर्व जामीन अर्जासाठी न्यायालयात धाव घेतली आहे. या अर्जावर ९ सप्टेंबर रोजी सुनावणी होणार आहे. हेलमा यानेही न्यायालयात अटकपूर्व जामिनासाठी अर्ज केला आहे.