Goa New Year Crowd : नाताळ झाल्या झाल्या नववर्षाच्या सुट्टीच्या पार्श्वभूमीवर मुंबई गोवा महामार्गावर पर्यटकांची प्रचंड गर्दी उसळली आहे. मुंबई, पुणे, बेंगळुरू, दिल्लीसह देश-विदेशातून आलेल्या पर्यटकांमुळे कोकण, गोव्यातील पर्यटन स्थळे गजबजून गेली असून पर्यटन व्यवसायाला मोठी चालना मिळाली आहे.

गोव्यातील समुद्रकिनारे, मंदिरे पर्यटकांनी फुलून गेले आहेत. नुकताच नाताळ साजरा झाल्याने त्यानिमित्याने होणाऱ्या कार्यक्रमांचा आस्वादही पर्यटक घेत आहेत. पणजी, मापसा, मडगाव आणि वास्को परिसरातही पर्यटकांची गर्दी स्पष्टपणे दिसून येत आहे.

मुंबई–गोवा महामार्गावर सतत वाहनांची गर्दी दिसत आहेत. संगमेश्वर बाजारपेठ परिसरात वाहने अडकून पडत आहेत. रत्नागिरी जिल्ह्याकडेही पर्यटक प्राधान्य देत आहेत.२७ डिसेंबर शनिवार असल्याने आणि वर्षसमाप्तीला त्यानंतर तीनच दिवस राहत असल्याने यानिमित्याने मोठी सुटी घेऊन पर्यटक बाहेर पडले आहेत.

रत्नागिरी, कर्दे, गुहागर, मुरुड या रत्नागिरी जिल्ह्यातील समुद्रकिनारी गर्दी होत आहे. श्री क्षेत्र गणपतीपुळे येथे दर्शनाला दुरून लोक येत आहेत. याचप्रमाणे सिंधुदुर्ग जिल्ह्यातील पर्यटनस्थळेही गर्दीने भरली आहेत. वाढत्या गर्दीमुळे व्यवसायिक मात्र खुश आहेत.