Mumbai Goa Highway Accident: मुंबई गोवा राष्ट्रीय महामार्गावर आयशर टेम्पो आणि ट्रकच्या झालेल्या अपघातात एकाचा मृत्यू झाला आहे. बुधवारी (18 ऑक्टोबर) संध्याकाळी उशिरा हा अपघात झाला.

कोल्हापूरकडून हातखंबाकडे येणाऱ्या ट्रकचा ब्रेक फेल झाल्याने अपघात झाल्याची माहिती समोर आली आहे.

राजेंद्र बाबल्या डांगे (वय 40, रा. हातखंबा) असे या अपघातात मृत्यू झालेल्या स्थानिकाचे नाव आहे. तसेच, दोन जण या अपघातात जखमी झाले आहेत.

मिळालेल्या माहितीनुसार, कोल्हापूरकडून हातखंबाकडे येणाऱ्या ट्रकचा ब्रेक फेल झाल्याने आयशर टेम्पोसोबत अपघात झाला. अपघातामुळे महामार्गावर बऱ्याचकाळ वाहतूक खोळंबली होती. रत्नागिरी ग्रामीण पोलीस खोळंबलेले ट्रॅफिक रात्री उशिरापर्यंत सुरळीत करण्याचा प्रयत्न करत होते.

घराच्या बांधकामासाठी राजेंद्र डांगे कोल्हापूरमधून लाद्या आणण्यासाठी गेले होते. कोल्हापूरकडून माघारी येताना हातखंबा येथे टेम्पो आणि ट्रकचा अपघात झाला. या अपघातात अंगावर राजेंद्र यांच्या दगडी लाद्या पडल्याने त्यांचा मृत्यू झाला आहे.

राजेंद्र डांगे यांच्या अपघाती निधनामुळे त्यांच्या कुटुंबावर शोककळा पसरली आहे. त्यांच्या पश्चात पत्नी, दोन लहान मुली एक मुलगा असा परिवार आहे.