Mulgao Mining Updates

डिचोली: खनिजप्रश्नी मुळगावात निर्माण झालेला वाद शमता शमत नाही. विरोध डावलून खाण व्यवसाय सुरू असल्याचा दावा करीत आज (शुक्रवारी) सायंकाळी मुळगावच्या काही जागृत नागरिकांनी खाणीवर धडक दिली.

दरम्यान, खनिजप्रश्नी तोडगा काढण्यासाठी येत्या २० रोजी ग्रामस्थांबरोबर बैठक घेण्यात येईल. तोपर्यंत खाणीवरील कामकाज बंद ठेवण्यात येईल, अशी ग्वाही ‘वेदांता’च्या अधिकाऱ्यांनी देताच खाणीवर जमा झालेले ग्रामस्थ रात्री उशिरा माघारी परतले.

मुळगावचे लोक खाणीवर जमा झाल्याची माहिती मिळताच, कंपनीचे अधिकारी खाणीवर दाखल झाले. याप्रश्नी खाण कंपनीच्या अधिकाऱ्यांबरोबर रात्री उशिरापर्यंत ग्रामस्थांची चर्चा चालू होती. गावचे प्रश्न सुटेपर्यंत मुळगावची खाण बंद ठेवा अशी मागणी करीत बारा दिवसांपूर्वी गेल्या ता. २६ रोजी मुळगाववासीय खाणीवर धडकले होते. याप्रश्नी दुसऱ्याच दिवशी ‘वेदांता’ खाण कंपनीच्या वरिष्ठ अधिकाऱ्यांनी मुळगाव येथे येऊन ग्रामस्थांसह बैठक घेतली होती.

ग्रामस्थांची खाणीवर धडक

मुळगावच्या सरपंच मानसी कवठणकर यांच्या नेतृत्वाखाली ३० ते ४० ग्रामस्थ आज सायंकाळी खाणीवर धडकले. खनिज व्यवसाय सुरू असल्याचा दावा करीत मुळगावच्या लोकांनी खाणीवरील मशिनरी आणि वाहने रोखून धरली होती. खाण अधिकारी येईपर्यंत खाणीवरून माघारी फिरणार नाही अशी भूमिका लोकांनी घेतली होती. रात्री ९.३० वाजेपर्यंत लोक खाणीवरच होते.