पर्ये: बेलवाडा-पर्ये, सत्तरी येथील सुजाता विश्वनाथ नाईक हिने शुक्रवारी रात्री आपल्या पाच वर्षीय मुलासह आत्महत्या केल्याने एकच खळबळ उडाली. सुजाताचा पती तिच्यावर संशय घेत असल्याने तिने हे टोकाचे पाऊल उचलले असावे, असा अंदाज व्यक्त करण्यात येत आहे. शुक्रवारी संध्याकाळपासून सुजाता बेपत्ता झाली. सकाळी मुलाला साखळीत एका नर्सरी शाळेमध्ये घेऊन गेल्यावर संध्याकाळी ती घरी परतलीच नाही.

(Mother commits suicide with 5-year-old son in Goa)

रात्री तिच्या घरच्यांनी चौकशी केली. पण ती सापडत नसल्याने वाळपई पोलिस स्थानकात ती मुलासह बेपत्ता असल्याची तक्रार दिली. पण आज दुपारी तिचा मृतदेह मिरामार किनाऱ्यावर मिळाल्याने या प्रकरणाला वाचा फुटली. नंतर तिच्या मुलाचा मृतदेह जुने गोवे येथे सापडल्याने हे आत्महत्येचे प्रकरण स्पष्ट झाले.

या दांपत्याला पाच वर्षांचा तेजस हा मुलगा होता. त्यातच त्या गोंडस मुलाला बोलण्या-ऐकण्याचे काहीसे व्यंग होते. मुलाच्या व्यंगत्वामुळे आई व्यथित झाली असावी, असे सांगण्यात येते. आजच्या तिच्या या टोकाच्या भूमिकेमुळे बिचाऱ्या मुलाचा बळी गेला. तिचा पती काही महिन्यांपूर्वीच गोमेकॉतील नोकरीवर रूजू झाला होता.

यापूर्वी पोलिसांनी घडविला होता समेट

या पती-पत्नीमध्ये कौटुंबिक वाद होता, असे कारण पुढे आले आहे. सुजाताचा पती तिचे अनैतिक संबंध असल्याचा संशय घ्यायचा. यासंबंधीचे एक प्रकरण एप्रिल महिन्यामध्ये घडले होते. त्याची तक्रार वाळपई पोलिसांत नोंदवली होती. त्यावेळी पोलिसांनी या दोघांमध्ये समेट घडवून आणला होता. पण त्यानंतरही त्यांच्यातील संबंध सुधारले नसल्याने त्याची परिणती या घटनेत झाली असावी, असे बोलले जाते. या ताणतणावामुळेच सुजाताने टोकाचा निर्णय घेतला असावा, अशी चर्चा सुरू होती.