Morpirla Panchayat Election

केपे: मोरपिर्ला ग्रामपंचायतीच्या प्रभाग सहासाठी झालेल्या पोटनिवडणुकीत ९१ टक्के मतदान झाले. या प्रभागात एकूण ३४० पैकी ३११ मतदारांनी आपला मतदानाचा हक्क बजावला. उद्या २१ रोजी केपे मामलेदार कार्यालयात मतमोजणी होणार असून या निवडणुकीत बाबू कवळेकर व आमदार एल्टन डिकोस्टा यांनी आपापले उमेदवार रिंगणात उभे केल्याने या निवडणुकीत बरीच रंगत आल्याचे स्थानिकांनी सांगितले. इतर पंचायतीसाठी झालेल्या पोटनिवडणुकीत मोरपिर्ला पंचायतीत सर्वात जास्त मतदान झाल्याचे दिसून आले आहे.

मोरपिर्ला पंचायतीच्या प्रभाग सहामधील पंच सदस्याने आपल्या पदाचा राजीनामा दिल्याने रिक्त झालेल्या या जागेसाठी हे मतदान झाले. मोरपिर्ला पंचायत ही पूर्वी बाबू कवळेकर यांच्या पाठीमागे ठामपणे उभी राहायची, पण गेल्या निवडणुकीत कवळेकर यांना बराच संघर्ष करावा लागला होता. माजी आमदार बाबू कवळेकर यांनी सोनू भिवा वेळीप, तर आमदार एल्टन डिकोस्टा यांनी तुळशीदास वेळीप यांना समर्थन दिले होते.

या निवडणुकीत दोघांमध्ये सरळ लढत झाल्याने उद्याच्या निकालाकडे सगळ्यांचे लक्ष लागून राहिले आहे. कवळेकर यांनी आपले वर्चस्व राखून ठेवण्यासाठी या निवडणुकीत बरेच प्रयत्न केले असून या विरोधात डिकोस्टा यांनीसुद्धा कवळेकर यांना शह देण्यासाठी आपल्या उमेदवाराला जिंकून आणण्यासाठी जोर लावल्याने उद्या होणाऱ्या निकालावर कुणाचे वर्चस्व राहणार हे दिसून येणार आहे.