पणजी: मुरगाव बंदरातून होणाऱ्या कोळसा हाताळणीत डिसेंबर महिन्यात १९.५ टक्क्यांनी वाढ नोंदवण्यात आली आहे. दक्षिण-पश्चिम रेल्वेच्या माध्यमातून डिसेंबरमध्ये १.१ दशलक्ष मेट्रिक टन कोळसा वाहतूक करण्यात आली. ही वाढ मागील वर्षीच्या तुलनेत ०.१८ दशलक्ष मेट्रिक टन इतकी आहे, अशी माहिती दक्षिण पश्चिम रेल्वेचे हुबळी येथील मुख्य जनसंपर्क अधिकारी डॉ. मंजुनाथ कनमाडी यांनी दिली.

डिसेंबर २०२५ मध्ये दक्षिण पश्चिम रेल्वेने एकूण ५.०७३ दशलक्ष मेट्रिक टन मालवाहतूक केली असून, ही आकडेवारी डिसेंबर २०२४ च्या तुलनेत २५.४ टक्क्यांनी अधिक आहे. दक्षिण पश्चिम रेल्वेच्या इतिहासातील ही आतापर्यंतची एका महिन्यातील सर्वाधिक मालवाहतूक असून, मार्च २०२४ मधील आधीचा विक्रम यामुळे मागे पडला आहे.

कोळशासह लोखंड खनिज, पोलाद, खनिज तेल, खत आणि कंटेनर वाहतुकीतही लक्षणीय वाढ झाली आहे. विशेषतः मुरगाव बंदराशी निगडित कोळसा आणि खनिज मालवाहतुकीमुळे या वाढीस मोठा हातभार लागल्याचे सांगण्यात आले.

एप्रिल ते डिसेंबर २०२५ या कालावधीत दक्षिण पश्चिम रेल्वेने एकूण ३८.३६ दशलक्ष मेट्रिक टन मालवाहतूक केली असून, ही मागील वर्षाच्या तुलनेत १८.५ टक्क्यांनी अधिक आहे. या कालावधीतही कोळसा, लोखंड खनिज आणि पोलाद वाहतुकीचा मोठा वाटा राहिला. उत्पन्नाच्या बाबतीतही रेल्वेने समाधानकारक कामगिरी केली आहे.

डिसेंबर महिन्यात दक्षिण-पश्चिम रेल्वेचे एकूण उत्पन्न ८३९.७० कोटी रुपये इतके असून, त्यात १४.३६ टक्क्यांनी वाढ झाली आहे. मालवाहतुकीतून मिळणारे उत्पन्न, प्रवासी वाहतूक तसेच इतर उत्पन्न घटकांतही वाढ नोंदवण्यात आली आहे. ही कामगिरी दक्षिण पश्चिम रेल्वेच्या कार्यक्षम नियोजनाचे, वाहतूक क्षमतेत केलेल्या वाढीचे आणि उद्योग तसेच बंदरांशी असलेल्या समन्वयाचे द्योतक असल्याचे डॉ. मंजुनाथ कनमाडी यांनी स्पष्ट केले. मुरगाव बंदरातून होणारी वाढती कोळसा हाताळणी प्रादेशिक औद्योगिक आणि आर्थिक विकासासाठी महत्त्वाची ठरत असल्याचेही त्यांनी नमूद केले.

ठळक व महत्त्‍वपूर्ण

डिसेंबरमधील कोळसा वाहतूक : १.१ दशलक्ष मेट्रिक टन (+१९.५%)

एकूण मालवाहतूक (डिसेंबर) : ५.०७३ दशलक्ष मेट्रिक टन (+२५.४%)

एप्रिल-डिसेंबर मालवाहतूक : ३८.३६ दशलक्ष मेट्रिक टन (+१८.५%)

डिसेंबरमधील उत्पन्न : ₹८३९.७० कोटी (+१४.३६%)