Goa: वाहनचालक व त्यांची सुरक्षा महत्त्वाची आहे. त्यामुळे त्यांना अडचणीचे ठरणारे शहर भागातील जाहिरात फलक, खांबांवरील केबल त्वरित काढण्यासाठी आपण मुरगाव उपजिल्हाधिकारी कार्यालयाला पत्र लिहिले आहे. तसेच याप्रकरणी मुरगावचे नगराध्यक्ष व मुख्याधिकारी यांनी दखल घेण्याची सूचना वास्कोचे आमदार दाजी साळकर यांनी केली.

येथील आयओसी चौकातील वाहतूक बेटावर लावण्यात आलेल्या जाहिरात फलकामुळे दोन दुचाकीचालक जखमी झाले होते. सामाजिक कार्यकर्ते शंकर पोळजी यांनी हे फलक व लोखंडी फ्रेम्स त्वरित हटविण्यात यावेत. ते हटविले गेले नाही तर निषेध उपोषण करणार असे जाहीर केले. त्यानंतर त्यांनी त्या वाहतूक बेटावरच ठाण मांडले.

आमदार साळकर यांनी पोळजी यांच्याशी बोलणी केली. पोळजी यांनी शहर भागातील वीज खांबांवर लावलेला जाहिरात फलक फाटल्याने तेथे उरलेल्या लोखंडी फ्रेम्स रस्त्यावर पडलेल्या आहेत त्या दुचाकीचालकांसाठी कशा धोकादायक आहेत याची माहिती दिली.

दाजी साळकर, आमदार, वास्को-

केबल हटविण्यासंबंधी आपण उपजिल्हाधिकारी कार्यालयाला पत्र लिहिले असून त्यासंबंधी कार्यवाही सुरू झाली आहे. नागरिकांना तसेच दुचाकीचालकांना धोकादायक ठरणारे फलक मुरगाव पालिकेने त्वरित हटवावेत.