Goa Police: वकील मारहाण प्रकरणाची आता न्यायदंडाधिकाऱ्यांमार्फत होणार चौकशी

Goa Police: ॲड. गजानन सावंत मारहाण प्रकरणाची न्यायदंडाधिकाऱ्यांमार्फत चौकशी करण्याचे आदेश शुक्रवारी सरकारने काढले आहेत. न्यायदंडाधिकारी तथा जिल्हाधिकारी मामू हागे यांच्याकडे हे प्रकरण चौकशीसाठी देण्यात आले असून, दीड महिन्याच्या कालावधीत चौकशी अहवाल देण्यात यावा, असेही आदेशात नमूद केले आहे.

गृहखात्याचे अवर सचिव विवेक नाईक यांनी हा आदेश पारीत केला आहे. पर्वरी येथे वकिलास पोलिसांनी मारहाण केली होती. या प्रकरणाविरोधात राज्यातील सर्व वकील संघटनांनी निषेध नोंदविला होता. मंगळवारी वकिलांनी रायबंदर येथील गुन्हे शाखेसमोर धरणे आंदोलन केले होते. मारहाण करणाऱ्या पोलिसांविरोधात कारवाई करण्याची मागणी वकिलांनी केली होती.

अखेर सायंकाळी पोलिस खात्याने या घटनेची दखल घेत चार पोलिसांना निलंबित केले होते. या प्रकरणी सरकारने कारवाई करण्यास केलेल्या विलंबामुळे विरोधकांना आयतेच कोलित मिळाले होते. त्यामुळे चोहोबाजूनी सरकारवर टीका होत असल्याने पोलिसांना निलंबित करण्याचे पाऊल पोलिस खात्याला उचलावे लागले होते.

तसेच, या प्रकरणाची सत्य परिस्थिती काय आहे, हे शोधण्याचे काम न्यायदंडाधिकाऱ्यांमार्फत करण्याचे आदेश सरकारने दिले आहेत. उत्तर गोवा जिल्हाधिकाऱ्यांकडे ही चौकशीची जबाबदारी दिली असून, सहा आठवड्यांमध्ये त्यांना हा चौकशी अहवाल सरकारला सादर करावयाचा आहे.