मोरजी: मोपा विमानतळावर तीन महिने बंद ब्लू कॅब टॅक्सी काउंटर सरकारने वाहतूक खात्याअंतर्गत सुरू केला असला तरी हा काउंटर १५ क्रमांकावर सुरू करण्यात आल्याने पुरेसे प्रवासी मिळत नसल्याने या टॅक्सी व्यावसायिकांनी पुन्हा आपल्या काही मागण्या पुढे रेटल्या आहेत.

१५ क्रमांकावर सुरू करण्यात आलेला काउंटर पहिल्या क्रमांकावर द्यावा, पार्किंगसाठी सोयिस्कर जागा द्यावी आदी मागण्या या व्यावसायिकांनी केल्या आहेत. सरकारने चतुर्थीपूर्वी या मागण्या मान्य कराव्यात, अशी मागणी केली आहे.

यावेळी टॅक्सी व्यावसायिक संघटनेचे सरचिटणीस महेश देसाई, अध्यक्ष संजय कांबळी व इतर टॅक्सी व्यावसायिक उपस्थित होते.

यावेळी टॅक्सी व्यावसायिकांनी आपल्या समस्या मांडताना मुख्यमंत्री डॉ. प्रमोद सावंत यांनी आम्हाला न्याय देण्याचा प्रयत्न केलेला आहे. परंतु मोपा विमानतळावर ब्लू कॅप टॅक्सी काउंटर १५ क्रमांकावर दिलेला आहे. त्या ठिकाणी प्रवासी मिळवताना खूप अडचणी येतात.

दिवसाला केवळ चार-पाच भाडी मिळतात, त्यामुळे या टॅक्सी व्यवसायिकांना मिळत असल्यामुळे सरकारने आम्हाला प्राधान्य क्रमाने प्रथम क्रमांकाचा काउंटर द्यावा. अशी जोरदार मागणी केली. असा त्यांचा दावा आहे.

या काउंटरवर एकूण २०० टॅक्सी व्यावसायिकांना सरकारने परमीट दिले होते. त्यातील आता केवळ १७० परमीटधारक व्यवसाय करतात, असे यावेळी सांगण्यात आले.

...भूमिपुत्रांना न्याय द्या : यावेळी टॅक्सी व्यावसायिकांनी आपल्या समस्या मांडत असताना मोपा विमानतळासाठी स्थानिक भूमिपुत्रांनी आपली जागा दिली आहे, त्यामुळे स्थानिक भूमिपुत्र टॅक्सी व्यावसायिकांना न्याय द्यावा, अशी जोरदार मागणी यावेळी करण्यात आली.