मुरगाव: मुरगाव नगरपालिकेने (MMC) कर्मचाऱ्यांचे थकीत पगार देण्यासाठी 3 कोटी रुपये कर्ज घेण्याचा निर्णय घेतला आहे. नगरपालिकेने कर्जासाठी अर्ज केला आहे. कर्मचाऱ्यांचे जानेवारी महिन्याचे पगार थकीत आहेत.

पगार न मिळाल्यास संतप्त कर्मचाऱ्यांनी आंदोलन करण्याचा ईशारा दिला आहे. याबाबत बोलताना MMC चेअरपर्सन दामोदर कासकर म्हणाले, नगरपालिकेने डिसेंबरचा पगार त्या महिन्याच्या 23 तारखेला ख्रिसमसच्या (Christmas) निमित्ताने दिला होता. जानेवारी महिन्याचा पगार फेब्रुवारीमध्ये दिला जाईल. कमी उत्पन्नामुळे MMC ची आर्थिक स्थिती कमकुवत झाली आहे. महसूल संकलनासाठी जबाबदार असलेले अधिकारी निवडणूक (Election) ड्युटीवर असल्याने MMC ला निधीच्या तुटवड्याचा सामना करावा लागला आहे. आर्थिक स्थिती मजबूत करण्यासाठी काही उपाय योजना केल्या जात आहेत.

ते पुढे म्हणाले, नगरपालिकेच्या कर्मचार्‍यांचे थकीत पगार भरण्यासाठी नगरपालिकेने बँकेकडून (Bank) कर्ज घेण्याची प्रक्रिया सुरू केली आहे. हा प्रस्ताव मंजुरीसाठी महापालिका प्रशासन संचालनालयाकडे (डीएमए) पाठवण्यात आला आहे.