पणजी: मोपा येथील मनोहर आंतरराष्ट्रीय विमानतळावर सीमा शुल्क विभागाने मोठी कारवाई करत सुमारे ३.१६ कोटी रुपये किमतीचा अमली पदार्थांचा साठा जप्त केला आहे. याप्रकरणी एका विदेशी पर्यटकाला अटक करण्यात आली आहे. विशिष्ट गुप्त माहितीच्या आधारे, सीमा शुल्क विभागाच्या एअर इंटेलिजन्स युनिटने ७ जानेवारी रोजी ही कारवाई केली.

बँकॉकहून ताश्कंदमार्गे मोपा विमानतळावर उतरलेल्या एका संशयित प्रवाशाला अधिकाऱ्यांनी अडविले. त्याच्या साहित्याची झडती घेतली असता, कपड्यांच्या खाली अतिशय शिताफीने लपवून ठेवलेला ९.०३६ किलो वजनाचा ‘हायड्रोपोनिक वीड’ हा उच्च दर्जाचा गांजासदृश अमली पदार्थ सापडला.

जप्त केलेला घटक हा अमली पदार्थ असल्याचे क्षेत्रिय चाचणी संचाद्वारे स्पष्ट झाले. त्यानंतर अमली पदार्थ आणि मनोविकार द्रव्ये कायदा, १९८५ च्या कलमाखाली प्रवाशाला तत्काळ अटक केली.

‘नशामुक्त भारत’ हे राष्ट्रीय स्वप्न साकार करण्यासाठी गोवा सीमा शुल्क विभाग कटिबद्ध आहे. अमली पदार्थांच्या तस्करीविरोधात ‘झिरो टॉलरन्स’ धोरण अवलंबले जात असून, या प्रकरणाचा सखोल तपास सुरू असल्याचे सीमा शुल्क आयुक्तांनी प्रसिद्धीपत्रकाद्वारे कळविले आहे.