Mopa Airport : मोपा आंतरराष्ट्रीय विमानतळाचा कायापालट करण्याचे काम सुरू झाले आहे. गोव्याची शान असलेली कुळागरे, पोफळीच्या बागायती या ठिकाणी फुलणार आहेत. तसेच बॉटल पाम व इतर शोभेची झाडे लावण्याचा सपाटा सुरू झाला आहे. उंच झाडांचा विमानांना अडथळा होऊ शकतो त्यामुळे सगळी झाडे बुटकीच असतील याची खात्री करूनच ती निवडण्यात आली आहेत. पूर्ण वाढ झालेली किमान 5 वर्षे वयाची झाडे लावण्यास प्रारंभ झाला आहे.

झाडे लावण्याचे काम एका मोठ्या नर्सरी फार्मला देण्यात आले असून जेसीबीच्या साहाय्याने खड्डे खोदले जात आहेत. तर क्रेनच्या साहाय्याने ही मोठी झाडे लावण्यात येत आहेत, अशी माहिती तेथील एका अधिकाऱ्याने दिली.

पावसाळ्यात पडझड होणार नाहीत अशीच झाडे निवडली असली तरी विमानतळाबाहेर मात्र जंगली झाडे खूप आहेत. विमानतळाची धावपट्टी बनविण्यासाठी 72 हजार झाडांची कत्तल करावी लागली. परवाना न घेता झाडे कापली जात असल्याने मुंबई उच्च न्यायालयाच्या गोवा खंडपीठाने दखल घेऊन स्थगिती दिली होती. जेवढी झाडे कापली जातील त्याच्या तिप्पट संखेने झाडे लावली जातील, असे आश्‍वासन न्यायालयाला दिले होते.

कुळागराचे स्वरूप

विमानतळाला अडथळा होणार म्हणून मोठी झाडे कापण्यात आली. पोफळीची लागवड करून या परिसराला कुळागराचे स्वरूप देण्याचा प्रयत्न सुरू झाला आहे. ही झाडे बुटक्याच जातीची असतील याची खबरदारी घेण्यात आली असली तरी हे मोपा विमानतळ सदैव हिरवागार ठेवण्याचा प्रयत्न राहील, असे येथील अधिकाऱ्याने सांगितले.