पणजी: ‘तो’ कधी येणार याची प्रतीक्षा संपली आहे. अंदमान निकोबारसह बंगालच्या खाडीवर मॉन्सूनचे आगमन झाले आहे, अशी आनंदवार्ता भारतीय हवामान खात्याने आज दिली. मॉन्सून यंदा प्रथमच चक्क 6 दिवस अगोदर अंदमानात दाखल झाला. गोव्यात जूनच्या सुरवातीलाच मॉन्सून धडकणार, असा अंदाज हवामान खात्यातर्फे वर्तविण्यात आला आहे.

साधारणपणे 1 जूनला मॉन्सून केरळात सक्रिय होतो. यंदा मॉन्सून केरळमध्ये 27 मे रोजी सक्रिय होईल, असा हवामान खात्याचा अंदाज आहे. त्यामुळे गोव्यातही तो नियमित 5 जूनपेक्षा अगोदर येईल. अधिक माहितीनुसार, पुढील 5 दिवस अंदमान आणि केरळमधील काही शहरांमध्ये मुसळधार पाऊस होईल. केरळसह दक्षिण भारतातील काही राज्यांमध्ये पाऊस सुरू असताना गोव्यासह महाराष्ट्रातील नऊ जिल्ह्यांमध्ये वादळी वाऱ्यासह मुसळधार पाऊस कोसळण्याची शक्यता वर्तविण्यात आली आहे.

19, 20 मे ला जोरदार पावसाची शक्यता

हवामान खात्याच्या गोवा वेधशाळेने दिलेल्या माहितीनुसार, राज्यात १८, १९ आणि २० मे रोजी विजांच्या कडकडाटाबरोबरच जोरदार वाऱ्यासह मुसळधार पावसाची शक्यता आहे. सध्या राज्यात ढगाळ आणि कोरडे वातावरण आहे. १९ आणि २० मे दरम्यान मुसळधार पावसाची शक्यता आहे.

सध्या हिंद महासागरात पावसासाठीची अनुकूल स्थिती निर्माण झाल्याने मॉन्सून २७ मेपर्यंत केरळमध्ये येण्याची शक्यता आहे आणि पुढे टप्प्याटप्प्याने तो सक्रिय होईल.

- डॉ. रमेश कुमार, मॉन्सून तज्ज्ञ

राज्यात मॉन्सून हा सर्वसाधारणपणे 5 जूनला दाखल होतो. केरळमध्ये यंदा तो 5 दिवस अगोदर दाखल होत आहे. गोव्यात मॉन्सून सक्रिय होण्यासाठी अनेक गोष्टींची आवश्यकता असते. मात्र, तो नियमित वेळेपेक्षा लवकर येईल हे निश्चित.

- एम. राहुल, मॉन्सून अधिकारी