मांडवी पुलावर (Mandovi Bridge) दुचाकीचा अपघात होऊन मांडवी नदीत पडलेल्या 21 वर्षीय युवकाचा आज (शुक्रवारी) सकाळी एका कॅसिनो जवळ मृतदेह सापडला. मोहम्मद आगा (वय 21, रा. भाटले) असे या युवकाचे नाव असून, दोन दिवसांपूर्वी त्याचा अपघात होऊन तो नदीत पडला. आगा याचा मृतदेह चिकित्सा करण्यासाठी गोवा वैद्यकीय महाविद्यालयाच्या रूग्णालयात (Goa Medical College) पाठवला आहे. पण, मोहम्मद आगा यांच्या कुटुंबियांनी 'मोहम्मदचा अपघात नव्हे घातपात' केल्याचा संशय व्यक्त केला आहे.

मोहम्मद आगा याच्या वडीलांनी आरोप करताना असे म्हटले आहे की, त्यांच्या मुलाचा अपघात झाल्यानंतर अपहरण करण्यात आले, नंतर त्याचा खून करून मृतदेह नदीत फेकून दिला. मोहम्मद चार दिवस पाण्यात होता असे त्याचा मृतदेह पाहून वाटत नाही. त्याच्या शरिरावर रक्त दिसत असल्याचे मोहम्मदचे वडील म्हणाले. पोलिसांनी याप्रकरणाचा सखोल तपास करावा अशी मागणी मोहम्मद आगा याच्या नातेवाईकांनी केली आहे.

अपघातात मृत झालेल्या मोहम्मद आगा याचा शुक्रवारी सकाळी एका कॅसिनोच्या बोटीजवळ पोलिसांना सापडला. मोहम्मदजवळ एटीएम सापडल्यानंतर त्याच्या आईवडीलांना मृतदेहाची ओळख पटविण्यासाठी बोलविण्यात आले. यावरून आता राजकारण देखील गोव्यात तापताना दिसत आहे. सोनाली फोगाट प्रकरणावरून हैद्राबाद पोलिसांनी गोवा पोलिसांवर असहकार्याचे आरोप केले आहेत. त्यानंतर आता आणखी एक प्रकरण समोर आले असल्याने विरोधकांनी गोवा सरकारला धारेवर धरले आहे.