Khandola News : खांडोळा, अयोध्येतील श्री राम मंदिराचे पाचशे वर्षांपासूनचे स्वप्न पंतप्रधान नरेंद्र मोदी यांच्यामुळेच सत्यात उतरले, असे मत गोवा पुनर्वसन मंडळाचे अध्यक्ष तथा कुंभारजुवेचे आमदार राजेश फळदेसाई यांनी व्यक्त केले.

कुंभारजुवा येथे हजारो महिलांच्या उपस्थितीत झालेल्या महिला मेळाव्यात ते रविवारी बोलत होते. महिलांच्या प्रगतीसाठी आणि मतदारसंघातील विकासकामांसाठी कटिबद्ध असल्याचेही आमदार फळदेसाई म्हणाले.

यावेळी सुलक्षणा सावंत, भारतीय महिला मोर्चा गोवाच्या अध्यक्ष आरती बांदोडकर, जुने गोवेच्या सरपंच मेधा पर्वतकर, सांत इस्तेव्हच्या सरपंच स्मिता सावंत, कुंभारजुवेच्या उपसरपंच विंदा जोशी, करमळीच्या उपसरपंच रेश्मा कोरगावकर, रिमा फळदेसाई आदी मान्यवर उपस्थित होते.

पंतप्रधान नरेंद्र मोदी तसेच मुख्यमंत्री प्रमोद सावंत यांनी आम्हाला ५ दिवस दिवाळी साजरी करण्याचे आवाहन केले आहे. आपण आपल्या आजूबाजूच्या मंदिरांना भेट देऊया आणि देवतांचे दर्शन घेऊया,असे आवाहन फळदेसाई यांनी केले.

या कार्यक्रमासाठी आम्हाला मैदान दिल्याबद्दल मॉन्टफोर्ड ब्रदर्सचे आभार मानतो. या कार्यक्रमासाठी चार दिवसांपासून परिश्रम केल्याबद्दल टीमचे आभार मानतो, असे फळदेसाई म्हणाले.

कुंभारजुवे मतदारसंघातील आमदार फळदेसाई यांच्या आवाहनाला प्रतिसाद देऊन उपस्थित सर्व महिलांनी आपापल्या जीवनात सर्वार्थाने स्वयंपूर्ण व्हावे. अयोध्येत श्री राम मंदिराची झालेली उभारणी हा सर्वांच्याच आनंदाचा क्षण आहे. महिलांनीही हा आनंदोत्सव उत्साहात साजरा करावा.

-सुलक्षणा सावंत, भाजप नेत्या