MRF Recruitment Controversy: गोव्यातील तरुणांना नोकरी देण्याऐवजी महाराष्ट्रातील तरुणांसाठी भरती सुरु केल्याच्या आरोपांवरुन वादात सापडलेल्या एमआरएफ टायर्स कंपनीच्या प्रकरणात आता एक मोठा ट्विस्ट आला आहे. यापूर्वी, कंपनीने त्यांच्या विरोधात सुरु असलेल्या नोकरभरतीची बातमी पूर्णपणे खोटी आणि निराधार असल्याचे सांगून वाद मिटवण्याचा प्रयत्न केला होता. मात्र, आता महाराष्ट्र नवनिर्माण सेनेचे (MNS) सिंधुदुर्ग जिल्हाध्यक्ष धीरज परब यांनी एमआरएफ कंपनीचा हा दावा खोडून काढला आहे. त्यांनी ई-मेलचा पुरावा सादर करत कुडाळ येथे नोकरभरतीची योजना खरी होती, असा दावा केला आहे.

आधीचा वाद आणि कंपनीचा खुलासा

सोशल मीडियावर एक बातमी व्हायरल झाली की, एमआरएफ टायर्स कंपनी गोव्यातील आपल्या फोंडा युनिटसाठी नोकरभरती महाराष्ट्रातील (Maharashtra) कुडाळ येथे करत आहे. या बातमीमुळे गोव्यातील राजकीय वातावरण चांगलेच तापले. गोवा फॉरवर्ड पार्टी आणि इतर विरोधी पक्षांनी यावर तीव्र आक्षेप घेतला. गोव्यातील तरुणांचा विश्वासघात होत असल्याचा आरोप करत त्यांनी मुख्यमंत्री डॉ. प्रमोद सावंत यांना यात हस्तक्षेप करण्याची मागणी केली.

या वाढत्या दबावानंतर एमआरएफ टायर्सने एक अधिकृत स्पष्टीकरण जारी केले होते. कंपनीने म्हटले होते की, "कुडाळ येथे नोकरभरती सुरु असल्याच्या बातम्या पूर्णपणे खोट्या आहेत." त्यांनी जाहीर केले की, 12 सप्टेंबर रोजी फार्मगुडी येथील आयटीआयमध्येच नोकरभरतीची प्रक्रिया पार पडणार आहे, ज्यामुळे सर्व गोंधळ दूर होईल, असे वाटले होते.

मनसेचा 'प्रूफ' आणि मोठा दावा

मात्र, आता एमआरएफच्या या स्पष्टीकरणाला मनसेने थेट आव्हान दिले आहे. सिंधुदुर्ग जिल्हाध्यक्ष धीरज परब यांनी एक ई-मेल पुरावा म्हणून सादर केला आहे, ज्यातून नोकरभरतीची योजना खरी असल्याचे सिद्ध होते, असा त्यांचा दावा आहे.

परब यांनी म्हटले की, "एमआरएफ आता म्हणतेय की, नोकरभरतीची बातमी खोटी आहे. पण आमच्याकडे पुरावा आहे. आम्ही त्यांच्याकडून अधिकृत ई-मेल मिळवला होता आणि मी स्वतः या भरतीचा एक आयोजक आहे." ते पुढे म्हणाले की, "यामागे काहीतरी राजकीय कारण आहे, त्यामुळे कंपनी आता माघार घेत आहे. पण आमच्याकडे पुरावा आहे की ही भरती खरी होती."

परब यांनी सादर केलेल्या ई-मेलमध्ये खालील गोष्टी स्पष्टपणे नमूद केल्या आहेत:

• ई-मेलची तारीख: मंगळवार, 9 सप्टेंबर, 2025.

• ई-मेल पाठवणारे: Logskim Solutions Pvt Ltd.

• ई-मेल ज्यांना पाठवला आहे: धीरज परब, मनसे जिल्हाध्यक्ष-सिंधुदुर्ग, महाराष्ट्र.

• ई-मेलमधील मजकूर: यात स्पष्टपणे म्हटले की, "एमआरएफ कंपनीसाठी जॉब फेअर (नोकरी मेळावा) आयोजित केल्याबद्दल आम्ही तुमचे खूप आभारी आहोत. या कार्यक्रमात एमआरएफच्या एचआर टीमसह (HR Team) आमचे प्रतिनिधी उपस्थित राहतील."

• नोकरभरतीचे ठिकाण: ब्र. नाथ पै शिक्षण संस्था, एमआयडीसी कुडाळ, सिंधुदुर्ग, महाराष्ट्र.

• वेळ आणि तारीख: सकाळी 10 ते दुपारी 2:30, 12 सप्टेंबर 2025.

हा ई-मेल एका खासगी एचआर एजन्सीकडून आला असून, त्यात एमआरएफची एचआर टीम उपस्थित राहणार असल्याचे स्पष्टपणे नमूद करण्यात आले आहे. त्यामुळे कंपनीने कुडाळ येथील भरती प्रक्रिया नियोजित केली होती, असा परब यांचा दावा आहे.

दरम्यान, हे प्रकरण आता फक्त गोवा आणि एमआरएफ कंपनीपुरते मर्यादित राहिलेले नाही तर, एकाच कंपनीच्या नोकरभरतीवरुन महाराष्ट्र आणि गोव्यातील (Goa) दोन वेगवेगळ्या राजकीय पक्षांमध्ये संघर्ष निर्माण झाला आहे. यातून केवळ रोजगाराचाच मुद्दा नाही, तर प्रादेशिक राजकारण, कंपनीची पारदर्शकता आणि खासगी एचआर एजन्सींची भूमिका यासारखे अनेक प्रश्न निर्माण झाले आहेत.

एकंदरीत, एमआरएफ कंपनीने दिलेले स्पष्टीकरण आणि मनसेने सादर केलेला पुरावा या दोन्हीमुळे आता नेमके सत्य काय, याबाबत संभ्रम निर्माण झाला आहे. कंपनीने या ई-मेलबद्दल आणि लॉग्स्किम सोल्युशन्स या संस्थेशी असलेल्या त्यांच्या संबंधाबद्दल पुन्हा एकदा स्पष्टीकरण देणे आवश्यक आहे. या प्रकरणातील पुढील घडामोडींकडे सर्वांचे लक्ष लागून राहिले आहे.