पणजी: विधानसभेतील आमदारांना विधानसभेच्या कामकाजाची माहिती व्हावी या उद्देशाने गोवा विधानसभा आणि पुण्याच्या रामभाऊ म्हाळगी प्रबोधिनीच्यावतीने आज सोमवार आणि मंगळवारी दोन दिवसीय प्रशिक्षण कार्यशाळेचे आयोजन करण्यात आले असल्याची माहिती विधानसभेचे सभापती रमेश तवडकर यांनी दिली आहे.

(MLAs will conduct training workshops)

सभापती तवडकर म्हणाले, या दोन दिवसीय कार्यशाळेचे उद्‌घाटन हिमाचल प्रदेशचे राज्यपाल राजेंद्र आर्लेकर यांच्या हस्ते होईल. यावेळी प्रमुख पाहुणे म्हणून मुख्यमंत्री डॉ. प्रमोद सावंत उपस्थित राहतील. यावेळी विशेष अतिथी म्हणून विरोधी पक्षनेते मायकल लोबो, विधानसभा कामकाजमंत्री नीलेश काब्राल, सचिव नम्रता उलमन आणि प्रबोधिनीचे संचालक रवींद्र साठे उपस्थित असतील.

या कार्यशाळेला राज्यसभेचे माजी सचिव देश दीपक वर्मा, महाराष्ट्र विधानसभेचे माजी सचिव डॉ. अनंत काळसे, उत्तर प्रदेशचे माजी राज्यपाल राम नाईक, डॉ. हरिष शेट्टी, उत्तर प्रदेशचे सभापती सतीश महाना आदी मान्यवर मार्गदर्शन करणार आहेत.

किती आमदार उपस्थित राहणार?

गोवा विधानसभा आणि पुण्याच्या रामभाऊ म्हाळगी प्रबोधिनीच्यावतीने सर्वच आमदारांना प्रामुख्याने नव्या आमदारांकरीता दोन दिवसीय कार्यशाळेचे आयोजन केले आहे. या कार्यशाळेला संघाच्या मुशीत तयार झालेले महत्वाचे नेते मार्गदर्शन करणार आहेत. त्यामुळे या कार्यशाळेला विरोधी गटातील किती सदस्य हजर राहणार याकडे सर्वांचे लक्ष लागून राहिले आहे. उद्‌घाटन सत्रात हिमाचलचे राज्यपाल राजेंद्र आर्लेकर, तर दुसऱ्या दिवसाच्या सत्रात उत्तर प्रदेशचे माजी राज्यपाल राम नाईक मार्गदर्शन करणार आहेत. हे दोन्ही नेते संघाशी संबंधित आहेत.