Vijay Sardesai: ऐन पर्यटन हंगामात गोव्यातील युवक मोठ्या प्रमाणात बेरोजगार आहेत. मुख्यमंत्री डॉ. प्रमोद सावंत हे केवळ इव्हेंट आयोजित करत असून त्यातून निधी वाया घालवत आहेत, अशी घणाघाती टीका गोवा फॉरवर्ड पक्षाचे अध्यक्ष फातोर्डाचे आमदार विजय सरदेसाई यांनी केली.

पत्रकार परिषदेत विजय सरदेसाई असे म्हणाले की, गोव्यातील बेरोजगारीचा दर हा देशस्तरीय बेरोजगारी दराच्या दुप्पट आहे. बेरोजगारी दराची राष्ट्रीय सरासरी 7.1 टक्के आहे. तर दर गोव्याचा बेरोजगारी दर 16.2 टक्के इतका आहे.

डॉ. प्रमोद सावंत यांच्या नेतृत्वाखालील भाजप सरकार केवळ आणि केवळ इव्हेंट आयोजित करत आहे. त्यांना फक्त इव्हेंटगिरी करायची आहे. त्यातून ते सरकारचा निधीही वाया घालवत आहेत.

दरम्यान, यापुर्वीही आमदार सरदेसाई यांनी ऑक्टोबर महिन्यात सरकार जाणीवपुर्वक बेरोजगारी वाढवत असल्याची टीका केली होती. बेरोजगारीच्या बाबतीत गोवा देशात सातव्या क्रमांकावर आहे. मंत्र्यांना ही परिस्थिती माहिती नाही, असेही सरदेसाई तेव्हा म्हणाले होते.