मडगाव : पाश्चिम घाट परिसरातून रेल्वे मार्ग दुपदरीकरण करण्यास सर्वोच्च न्यायालयाने निर्बंध आणलेले असताना हे निर्बंध इतर मार्गासाठी नाहीत, अशी भूमिका घेत वास्को ते मडगावपर्यंतच्या दुपदरीकरणाचे काम पुढे रेटण्याचे रेल्वेने ठरविल आहे. (MLA Ulhas Tuenkar opposes railway double tracking in Goa)

आतापर्यंत आम्ही भाजपचे नावेली आमदार उल्हास तुयेकर यांच्यासह आठ आमदारांची भेट घेऊन त्यांना आमची बाजू पटवून देणारे निवेदन सादर केले आहे. उल्हास तुयेकर यांच्यासह सर्व आमदारांनी आमच्या मागण्यांना समर्थन दिले आहे, अशी माहिती या संघटनेचे सहनिमंत्रक अभिजित प्रभुदेसाई यांनी सांगितले.

या मार्गाला विरोध करणाऱ्या ‘गोयांत कोळसो नाका’ या संघटनेने आक्रमक रुप घेत हा मार्ग जात असलेल्या सर्व आमदारांच्या भेटी घेऊन त्यांना या विस्तारित मार्गाला विरोध करण्याची मागणी केली आहे. हा मार्ग फक्त कोळसा वाहतुकीसाठी विस्तारित केला जात आहे, हे रेल्वेने न्यायालयात मान्य केले आहे. न्यायालयाच्या निकालाने हे काम बंद पडले आहे. अशा परिस्थितीत वास्को ते मडगावपर्यंतचा मार्ग विस्तारित करण्यासाठी माजोर्डा इरोसी या भागातील घरांवर संक्रांत आणणे अयोग्य असे मत त्यांनी मांडले. विधानसभेच्या पावसाळी अधिवेशनात हा मुद्दा चर्चेत आणावा, अशी मागणी आम्ही या आमदाराकडे केली आहे. सोमवारी आम्ही आणखी काही आमदारांना भेटणार आहोत, असे प्रभुदेसाई यांनी सांगितले.

हल्लीच मुख्यमंत्री प्रमोद सावंत यांनी फक्त तीन आमदाराबरोबर बैठक घेवून या विस्तारित मार्गाच्या कामाला संमती देण्याचा निर्णय घेतला होता. त्या पार्श्वभूमीवर हे आंदोलन पुन्हा एकदा पेटण्याची शक्यता व्यक्त केली जात आहे. नुवेचे आमदार आलेक्स सिक्वेरा यांनी आपला या आंदोलकांना पूर्ण पाठिंबा असल्याचे यावेळी जाहीर केले.